Beste hilabete batez konfinamenduak ikastetxeak itxita mantendu ditu. Ondorioz, ikasle asko online ari dira eskolak jasotzen eta lanak eskuratzen, nor bere etxetik, bere ordenagailutik, pantailaren beste aldetik, eta ez da gauza bera. Denak dira horren jakitun, ikasleak, irakasleak eta gurasoak. Informazioa eta interakzioa bermatzeko ekilibrista lanak egiten ari dira guztiak eta egoera eta premia berri horietatik sortu dira laguntza-sareak. Modu batera edo bestera, Euskal Herri osoan laguntza-sareak sortzen ari dira eta horietako hiru esperientzia bildu dira hemen: Donostiako Axular lizeoan ikasle ohiak ari dira ikasleei laguntzen, Etxarri-Aranatzeko Andra Mari ikastolan praktiketako ikasle ohiak eta Lasarte-Oriako Oriarte institutuan ikasleak.