> 2017ko laugarren hiruhileko datuen arabera (EPA inkestari dagozkionak), Euskal Herriko langabezia tasa %10,19koa da (INE), aurreko urteko laugarren hiruhilekoan baino 1,26 puntu txikiagoa. EUSTATek berriki kaleratutako datuen arabera, Euskal Herrian langabezia tasa iaz baino 1,15 puntu txikiagoa da eta %10,52an kokatzen da. Azken hiruhilekoan langabetuen bolumena apaldu egin da lurralde guztietan, Ipar Euskal Herrian ezik (+300).
> INEeko datuen arabera, azken hiruhilekoan langabezia tasa nabarmen jaitsi da, bereziki Araban (-1,91) eta Bizkaian (-1,08). Ipar Euskal Herrian, aldiz, 0,2 puntu igo da. Edonola ere, Ipar Euskal Herriko langabezia tasak Euskal Herriko apalenetarikoa izaten jarraitzen du (%8,55).
> 2017ko azken hiruhilekoan, Euskal Herriko langabezia tasa 0,8 puntu apaldu da, EB-28n ez bezala (+0,1). Hala, bi lurraldeen arteko aldea murriztu egin da, nahiz eta Euskal Herriko langabeziak Europako Batasuneko bataz bestekoa baino 2,8 puntu handiagoa izaten jarraitzen duen (INE).
> Azken hiruhilekoko datuek Euskal Herriko langabezia tasa %10,80an finkatzen dute 2017an (INE), aurreko urtean baino 1,39 puntu azpitik. Hortaz, langabezia apaltzeko joera handia izan da aurten.> Euskal Herriko lan merkatuan langabeziaren eragina apaltzen ari da, baina prekarietatearen itzalak handiegia izaten jarraitzen du. Esaterako, 2017 urtean langabetu gisa erregistraturikoen %61ak ez du langabezi-saririk izan, lan merkatuko prekarietate eta babesgabetasunaren ondorioz.
Attachment | Tamaina |
---|---|
gng_po-2018-01-25-eh_langabezia.pdf | 399.18 KB |