Eraldaketaren asmoa eta sortzen zaizkigun galderak ikuspegi anitzetatik aztertu nahi izan ditugu. Komunean dugu Angela Davisek zapalkuntzaz eman zigun definizio sendoa. Eta, jakina, zapalkuntza egoera orokor horri bestelako proiektu bat aurrez aurre jartzeko borondatea. Bidean goaz, ez gara atzo hasitakoak. Baina, gogoeta asko eskatzen duen bidea da aurretik duguna. Gure buruari galderak egin dizkiogu epe labur eta luzean ditugun erronken gainean. Eta halaber, eraldaketa prozesuaren nolakotasunaz, behar ditugun aliantzetaz, pairatzen dugu jazarpen eta indarkeriaz, osatu nahi dugun subjektu eraldatzaileaz, botereaz... hausnartzen jarri ditugu hainbat lagun. Esan bezala, etengabea den gogoeta horri ekarpen bat gehiago egiteko asmoz.