Hala ere, aurtengo otsailaren 27an hartzekodunen konkurtsoan sartzeko eskatu zuen, eta konkurtso-administratzaileak eskaera onartu zuen. Ondoren, administratzaile horrek jakinarazi zigun guri, batzordekideoi, enpresaren egoera zaila kaudimen gabezia nabarmena zela-eta. Konponbideren bat aurkitu ezean, litekeena da enpresa likidazio-prozesu batean sartzea.

Joan diren zazpi hilabete hauetan Uscal-eko langileok zalantzaz beteriko egoeran bizi gara, batetik itxaropen faltsuak irudikatu dizkigute, eta bertzetik gure soldaten ordainketa gibelatuz joan da gaur arte, ez baititugu oraindik atzerapenak jaso. Gure aldetik informazioa eskatu diogu zuzendaritzari enpresaren egoera ekonomikoari buruz, baina kudeatzaileak ez digu deus erantzun. Dena dela, Uscaleko langileok profesionaltasun eredugarriaz jokatu dugu uneoro.

Plantilla osoaren enpleguari eustea izan da beti gure eskakizuna. Enpresa, bere aldetik, kaudimen gabeziaren egoeraz jabetu bada ere, ez du neurri zehatzik hartu, gure atsekaberako. Horregatik, Zuzendaritzaren eta kudeatzailearen kudeaketa salatu nahi dugu, ezin txarragoa izan baita; izan ere, eskandaluzko zorpetze-maila batera eraman gaitu, eta ez dute plan egokirik taxutu egoera onbideratze aldera.

Tamalez Covid-19ak eragindako osasun-alarmak gure arazoak larriagotu ditu, eta balizko itxiera baten atarian utzi gaitu, 85 familiaren etorkizuna kolokan jarriz.

Azkenik, enpresako langileok Nafarroako Gobernuaren eta Sodenaren esku hartzea eskatzen dugu. Eskuhartze hori ezinbertzekoa da irtenbideak bilatzeko orduan; batez ere, kontuan hartzen badugu gure enpresa Nafarroako Gobernuaren espezializazio adimentsuaren estrategiaren (S3) partaide dela.