ARGIA.eus

2020ko uztailaren 13a

Eragileen plaza!

SORTU KONTUA
ELA klase sindikatu abertzalea da, 1911n sortua eta egun 100.000 afiliatu dituena.
2020-01-14 12:10
Eusko Jaurlaritzako oraingo Osasun sailburuak, Nekane Murgak, ebaluazio-batzordeko buru gisa parte hartu zuen bi hautaketa-prozesutan, Osasun Saileko bi burutza-postu hornitzeko salatzen du ELAk. Eta bere orduko kargua zela-eta, legez parte hartzerik ez bazuen ere, parte hartu zuen. Indarrean dagoen legeriak eragotzi egiten du konfiantzazko kargudunek ebaluazio-batzordeetan parte hartzea, behar bezalako independentzia eta inpartzialtasuna ez dutelakoan. Kasu honetan, Murga sailburuak, jarduketa erabat irregularra eginez, batzordeburu jardun zuen; eta, beraz, hautagaien ebaluazioan eta lanpostu bakoitza nori esleitzeko erabakian parte hartu zuen.

Harrigarria bada ere, bi kasuetan karrerako funtzionario bakar batek ere ez zuen eskuratu eskainitako bi lanpostuetako bat ere. Lehenengoan, deialdia hutsik geratu zen (hautagaietako bat bera ere ez zen egokitzat jo), eta lanpostua aldi baterako kontratazio-poltsen bidez bete zen (204 hautagaik osatutako poltsa txikia da, Osakidetzako kategoria-poltsa ugarietako 3.000tik gorako hautagaien aldean).

Bigarrenean, izendapena bitarteko funtzionario bati ere esleitu zitzaion; baina, kasu honetan, ez dakigu deialdira aurkeztu zen edo aldi baterako kontratazio-zerrendatik izendatu zuten.

ELAk behin eta berriz salatu du Osasun Saileko pertsonala (aldi baterakoak zein finkoak) hautatzeko eta kontratatzeko sistema osoa ustel dagoela. Azaldutako gertaerak ohikoak dira eta Osakidetzaren azken LEPean ere gertaturikoak, denen agerian geratu direnak, kultura eta praktika batzuen adibide baino ez dira. Horren azpian dagoen sistema halakoa da, denek ezagutzen duten eta askok onartzen duten status bat, non gutxi batzuek erabakitzen duten nork lan egingo duen eta nork ez, bai aldi baterako postuetan, bai plaza finkoetan.

Ez gaude gertaera isolatu baten aurrean, langile batzuen jokabide oker baten ondorio dena, Murga Sailburuak berak nahi duen bezala. Ezta milaka langile zalantzan jartzen ere. Salatzen duguna da langileak hautatzeko sistema ustel bat indarrean egon dela eta badagoela oraindik ere, eta sistema horretan Osakidetzako eta Osasun Saileko zuzendaritza eragile bat gehiago izan dela, batzuetan parte-hartze aktiboarekin eta beste batzuetan langileen hautaketa irregularra onartuz eta ahalbidetuz.

Behin betiko amaitu behar da sistema horrekin, eta, horretarako, osasun publikoak dituen arazo larriei heldu behar zaie, eta aldaketa sakonak egin behar dira egungo politiketan: osasun publikoan inbertsioa handitu eta giza baliabideak eta baliabide materialak handitu; aldi baterako eta iruzurrezko kontratazioarekin amaitu (% 40ko tasa du gaur egun); herritarren asistentzia-kalitatea bermatu, eta osasun publikoa pribatizatzeari utzi.

Kontrakoa, propagandatik eta aurpegi-aldaketa soiletatik harago, Gobernuaren apustu irmoa da enplegu-sistema klientelar horri eustearen alde eta osasungintza pribatuari atea irekitzearen alde.

Hau da orain arte gertatu dena:

  • 2017ko urtarrilaren 9tik eta Osasun sailburu izendatu zuten arte (2019ko martxoan), Nekane Murga Eusko Jaurlaritzako Osasun Saileko Plangintza, Antolamendu eta Osasun Ebaluazioetako zuzendaria izan zen, konfiantzazko eta izendapen askeko kargua.
  • Bera zuzendari zela, eta zehazkiago esateko, 2017ko martxoan eta abuztuan, hurrenez hurren, Eusko Jaurlaritzako Osasun Saileko Plangintza, Antolamendu eta Osasun Ebaluazioetako Zuzendaritzan bi prozesu sustatu ziren, zerbitzu-eginkizunetan bi burutza-postu betetzeko. Aipaturiko bi burutza-postu horietako bakoitzaren ardurapean 6 langile zeuden.
  • Zerbitzu-eginkizunetako bidea postuz aldatzeko behin-behineko mota bat da. Hala ere, LEPik eta lekualdatze-prozesurik ez dagoenez, zerbitzu-eginkizunak postuz aldatzeko ohiko bidea bilakatu da langileentzat, norberaren bizilekura hurbiltzeko edo beste eginkizun edo sail batzuetara aldatzeko. Prozesu horietan parte hartzeko lehentasuna karrera-funtzionarioek dute (plaza finkodunak), eta haien ezean, bitarteko funtzionarioek ere (behin-behinekoak) parte hartu dezakete.
  • Titulazio-maila jakin bateko lanpostuetan, kasu honetan bezala, deialdi horietan hautagaien ezaguerak eta trebetasunak ebaluatzeko proiektu-proba bat egin behar da. Proba hori ebaluazio-batzorde batek kalifikatu behar du.
  • Bada, bi deialdi horietan, eta indarreko legeriak debekatzen duen arren (Funtzio Publikokok Sailburuordearen 2/2017 Jarraibidea, maiatzaren 26koa, lanpostuak aldi baterako betetzeko prozedurak izapidetzeko irizpideak biltzen dituena; 190/2004 Dekretua, urriaren 13koa, Euskal administrazio publikoetako funtzionarioen lanpostuak betetzeko araudia onartzen duena; Euskal Funtzio Publikoko 6/1989 Legearen 96. artikulua eta Enplegatu Publikoaren Oinarrizko Estatutuaren 5/2015 Legegintzako Errege Dekretuaren 12. artikulua), Nekane Murga orduko zuzendariak hartu zuen ebaluazio-batzordearen burutza.

?

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.