Horregatik, ELAk PSN, Geroa Bai eta Nafarroa Suma kritikatzen ditu, euren aldeko botoarekin edo abstentzioarekin enpresen ondareei ezarritako zerga ezabatu delako. Era berean, ELAk Podemosen inkoherentzia salatzen du, zerga hori kentzea sustatu duen gobernuko kide den bitartean legearen aurka bozkatzeagatik, bere botoa erabakigarria ez dela dakielako, alegia. Bestalde, joan den astean Nafarroako Gobernuak eta EH Bilduk lortutako akordio fiskala deitoratzen du ELAk.

EH Bilduk Gobernuarekin bi lege fiskal onartzea bermatu duen akordioa egin zuen Gobernuak fiskalitateari buruzko 6 azterlan egiteko konpromisoaren truke, enpresa ondareari ezarritako zerga kentzeko legea atzera botatzera baldintzatu beharrean. Nafarroako Gobernuaren eta EH Bilduren arteko fiskalitateari buruzko akordio hau oso aurrekari txarra da Nafarroako aurrekontuak negoziatzeko. Izan ere, Nafarroako Gobernuak austeritate-politika betetzeko duen konpromisoak (gastu-araua, defizit-muga, superabita zorra amortizatzera bideratzea gizarte-premietara bideratu ordez...) eta zerga-erreforma garrantzitsu bat egiteari uko egiteak (Europar Batasuneko bataz-beteko presio fiskal bera izango bagenu Nafarroan urtero 1.675 milioi euro gehiago bilduko lirateke) aurrekontuen edukia erabat baldintzatzen du, ezbairik gabe neoliberalak izango diren aurrekontuena.

ELAk kezka agertu nahi du Parlamentuan oposizioa egingo duen ezker instituzionalik ez dagoelako, aurrekontu politikaren eta zerga-sistemaren eraldaketa erradikala defendatzen dugun indar sindikalekin eta sozialekin bat egingo duena.