Nafarroako Lan Arloko Epaitegiak atzera bota du Sephoren asmoa, otsailaren 6tik egiten ari den greba legez kanpokoa dela salatu baitzuen enpresak.
Epaiak ondorioztatu du greba legezkoa dela eta bere helburua Nafarroako dendetarako hitzarmenaren negoziazioa bultzatzea dela, zuzendaritzak ezezkoa eman ostean. Langileek eta sindikatuak negoziazio-eremu hori irekitzeko eta, egoki baderitzote, mobilizatzeko duten eskubidea aitortzen du.

ELAk gogorarazi duenez, Sephorak eskubide hori ukatu nahi zuen eta, gainera, greba-egun bakoitzeko 8.000 euro eskatu zizkien ELAri eta langileen bi ordezkariei. Asmoaren desproportzioaz ohartzeko, nahikoa da adieraztea Estatuko hitzarmenean aplikatzen den orduko soldata orduko 7,68 euro gordinekoa dela (aparteko ordainsariak eta oporretako ordainsaria barne).

ELAk ontzat jo du epaia, baina deitoratu egin du grebarako oinarrizko eskubidea larriki desitxuratzen duten enpresa-jarduera horiek enpresarentzat inolako ondoriorik ez izatea.

Bestalde, CCOOk enpresa horretan duen zeregina salatu du ELAk. Greba baten erdian, eskiroletan oinarrituta, ELAko (La Moreako denda) ordezkarietako bat errebokatzea sustatzeaz gain, zentro horretan bertan behera uzteko ere eskatu zuen berehala, enpresaren asmoen arabera. ELAren ustez, "tamalgarria da CCOOk errespeturik ez izatea langile guztien lan-baldintzak hobetzeko borrokan ari diren pertsonekiko, greban parte hartzen ez dutenekiko barne. Estrategia desberdinak alde batera utzita, errespetu horrek gutxieneko kontua izan beharko luke klaseko sindikatua dela diotenentzat".

Azkenik, ELAk Sephorako langileak egiten ari diren borrokari balioa eman nahi dio. Sephora luxuaren sektoreko liderra den LVMH multinazionalaren parte den enpresa bat da, eta 75 markaren jabea: Christian Dior, Louis Vuitton, Bulgari, Moet Chandon, Loewe, Kenzo, DKNY... 2017an 140 milioi euroko fakturazioa izan zuten. Hala ere, lan-baldintzak oso eskasak dira; lanaldi osoko saltzaile baten soldata 912 €-koa da, baina langile gehienek kontratu partzialak dituzte eta astean 6 egunetan lan egin behar dute (igandeetan eta jaiegunetan ere bai). Langileek beraiek esan ohi duten bezala, "1.000 krema saltzen ditugu 900 euroko soldaten truke". Egoera horren aurrean, Sephora enpresako langileak greban daude otsailaren 6tik, enpresako prekarietateari aurre egiteko.