2019ko maiatzaren 28an ordezkari sindikalek Avanvida enpresaren jakinarazpen bat jaso zuten. Horren bidez jakitera eman zieten "gaitasun-osagarri" delakoa gehiago ez ordaintzeko erabakia hartua zutela, alde bakarretik eta arrazoirik gabe. Osagarri hori langileen antzinatasunaren eta esperientziaren ordez abonatzen zen. Horren ondorioz langileek 100 eta 300 euro bitartean gutxiago jasoko dute hilero beren nominetan.

Soldata-murrizketa horrez gain, enpresak erreklamatu die langileei 2018ko abendutik osagarri horregatik jasotakoa itzultzeko, data hartan hasi baitziren osagarria jasotzen.

Zentro horietan arreta, errehabilitazio psikosoziala, arreta iraunkor anbulatorioa eta eguneko arreta-zerbitzua eskaintzen zaizkie nahasmendu mental larria duten pertsonei, gizartean modu normalean bizi izateko trebetasunak ikas edo berreskura ditzaten. Avanvida enpresak kudeatzen ditu zentro horiek, Nafarroako Gobernuaren Gizarte Politiken Departamentuarekin sinaturiko itun baten bidez. Hori dela-eta, Nafarroako Gobernuari bitartekaritza-lana egiteko eskatzen diogu, gatazka lehenbailehen onbideratzeko, eta zerbitzuaren kalitatean kalterik ez izateko.