Ildo horretan, berretsi du sindikatuen gehiengoak Hezkuntza Publikorako propio deitutako grebaren garrantzia, LABek bat ez egin arren: “LABek arazo bat dauka azaltzeko zergatik hezkuntza publikokoa den greben artean salbuespena. Sindikatu guztiak gaude zerbitzu publikoetako deialdian, itunpeko ikastetxeetakoan edota unibertsitatean”, gogorarazi du, “eta hezkuntza publikoan ez? Zergatik ez du nahi? Akordio bat duelako aurretik lotuta gutxiengoan, eta jakinda eskasa dela. Zergatik sinatu du? Akordio politiko bat dagoelako Hezkuntzan, EH Bildu ere badagoena, eta LABek babes sindikala eman dio akordio horri”.

Era berean, Lakuntzak azpimarratu du inflazioaren atzean daudela enpresa handien gero eta handiagoak diren etekinak eta espekulazioa, ez langileen soldata igoera. Areago, pobretze fase batean gaudela ziurtatu du. Horregatik, aberastasuna hobeki banatzeko ezinbestekotzat jo du fiskalitatea aldatzea, areago zerbitzu publikoak hobetu nahi badira.

Espainiako presidentetzarako inbestidura ere aukera gisa ikusten du idazkari nagusiak, baina konfrontatzeko eta lehentasunak zehazteko gai badira Euskal Herriko alderdiak. “Kataluniakoek zer eskatzen duten badakigu: amnistia eta autodeterminazioa. Euskal Herrikoak zehazki ez”. Horregatik, “debaldeko” inbestidurarik ez du nahi Lakuntzak, Lehendakariak defendatutako aldebiko eredua baztertu eta autogobernuaren higadura eteteko edukiak eta konfrotazioa beharrezkoa delako.