Gaur egun, egiturazko plantilla erizain-talde eta erizaintzako laguntzaile-talde eskas batek osatzen du, eta, asteko une jakin batzuetan, kategoria bakoitzeko beste profesional baten errefortzu puntualak ditu. Oraingoz, Zuzendaritzaren erantzuna une jakin batzuetan langile gehiago egotea izan da, oporraldietan adibidez; baina hori ez da nahikoa zerbitzu horren beharretarako, plantillaren iritziz.

Horren adibide garbia da gertatzen ari dena larrialdi-zerbitzuetan; izan ere, bizi-arriskuko egoerei erantzun behar zaienean (hala nola, bihotz-biriketako bizkortzea). Hori gertatzen denean, langile guztiek (bi erizain eta laguntzaile bat) dena utzi behar dute, eta larrialdi hori artatzera joan behar dute, protokoloak hala agintzen duelako. Ondorioz, gainerako larrialdi-zerbitzuak (boxak eta triajea) ez daude bermatuta.

Jakina, horrelako egoerek zuzenean eragiten diote larrialdian ematen den arretaren kalitateari; izan ere, horrelako larrialdi bati erantzuteko, langileek beren ohiko lanpostuak "hutsik" utzi behar izaten dituzte, laguntza hori emateko.

Azken urteetan, larrialdi-zerbitzu horretan arreta-eskaera nabarmen handitu da, bai eta artatutako egoeren larritasuna ere. Lehen mailako arretaren egoera kaskarra dela eta, larrialdietako zerbitzua gehiegi kargatzen da, eta Lehen Arretan artatu ezin den guztia bere gain hartzen du, tratamendu kronikoak, sendaketak, injektagarriak eta abar barne, eta osasun-zentroak itxi ondoren ere eman behar dira.
Hala erakusten dute plantillak ESIko Zuzendaritzari aurkeztu dizkion zenbakiek eta datuek, erakundearen beraren datu ofizialek. Hala ere, igoera horri langile kopuru berarekin egin zaio aurre, eta horrek eragin handia du lan-baldintzetan, batez ere lan-kargetan eta arrisku psikosozialetan.

Horregatik guztiagatik, ELA, SATSE, LAB, CCOO, UGT eta SAE sindikatuek Barrualde-Galdakao ESIko Zuzendaritzari eskatzen diote erizainen eta erizaintzako laguntzaileen plantilla handitzeko eskaerari erantzuteko, herritarrei zerbitzu osoa eta kalitatezkoa bermatu ahal izateko. Plantilla handitzeak hobekuntzak ekarriko lizkieke herritarrei, itxaronaldiak arinduko liratekeelako eta, batez ere, Larrialdietako pazienteen segurtasuna bermatuko litzatekeelako, maila horretako ospitale baterako ezinbestekoa dena.