Iruñeko Miserikordia Etxeko Enpresa Batzordearen prentsa oharra

Iruñeko Miserikordia Etxeko enpresa batzordea, ELA, LAB, CCOO, UGT eta USO Sindikatuek osatua, hedabideen aurrean agertu da egoitzaren zuzendaritzak hitzarmen berriaren negoziazioan izan duen jarrera salatzeko.

Egoitzako hitzarmena 2020ko abenduan iraungi zen. Une horretatik aurrera, enpresa-batzordeak, oro har, plataforma bateratu bat egiteko lan egin du, langileen eskaera nagusiak jasotzen dituena. Sindikatu guztiok ahalegin handia egin dugu negoziazio kolektiborako plataforma hori bateratzeko.

2020ko martxotik mundu mailako pandemia batean murgilduta gaude, egoitza hau, sektoreko gainerakoak bezala, bereziki kaltetua izan da, eta, zoritxarrez, kutsatu ugari izan ditugu, bai erabiltzaileak bai langileak, eta erabiltzaileen artean ere heriotzak izan ditugu.

Zoritxarrez, Miserikordia Etxeko langileek, batez ere zuzeneko arretako langileek, pandemia euren azalean jasan dute, eta arriskuan jarri dute beren osasuna eta familiarena. Arrisku fisikoak, psikikoak eta ekonomikoak daude, eta horiek guztiek neurri txikiagoan irauten dute gaur egun ere. Lan hau oso gogorra izan da, eta gaur egun ere bada, bai arlo fisikoan eta baita emozionalean ere. Zentro honetako langileen profesionaltasunari esker eutsi zaio erabiltzaileen arretari. Argi eta garbi frogatuta geratu da langileen konpromisoa eta jarrera.

Aurreko guztia kontatu eta Iruñeko Miserikordia Etxeko langile guztiek egindako lan eta konpromiso handia azaldu ondoren, hitzarmen kolektiboa negoziatzen hasi ginen joan den martxoan. Bi negoziazio-bilera egin genituen enpresarekin, eta mobilizazioak hasi beharrean gaude, haien jarreragatik eta haien proposamena inposatu nahi zutelako. Zuzendaritzak bi bide ezartzen dizkigu: bata, negoziatzeko aukerarik gabe, hitzarmena bi urtez izoztea, hobetzeko bermerik gabe, eta, bigarrena, oinarrizko eskubideak ezabatzea, hala nola antzinatasuna eta egutegiaren banaketa, biak ala biak Iruñeko miserikordia etxean duela urte asko lortutakoak.

Hori dela eta, langile guztientzako greba-eguna deitu behar dugu, datorren apirilaren 21ean, lan-txanda guztietan, zuzendaritzaren jarrera oldarkorra dela eta.

Enpresa-batzordeak aho batez errefusatu ditu zuzendaritzaren proposamenaren formak eta mamia. Gure asmoa negoziatzen jarraitzea da, harik eta langile guztien lan-baldintzak onartu eta hobetuko dituen hitzarmen bat lortu arte. Oso urte gogorra izan da, eta plantillaren profesionaltasuna frogatu da. Enpresak ahalegin hori aitortu behar du, bidezko eta beharrezko hitzarmen bat sinatuz.