2023-10-03 14:34
ELAk salatu duenez, Eusko Jaurlaritzak iragarritako %0,5eko soldata igoerarekin, langile publikoek %5,3ko erosahalmena galduko dute 2022tik aurrera. Zehazki, erosahalmenaren galera %2,9koa izango da 2022an, eta %2,4koa 2023an. Horrekin, langile publikoek erosahalmenaren %20ko galera metatu dute dagoeneko. Gobernu Kontseiluak onartutako erabakiak langile publikoen lan baldintzen arloko eskumenei uko egitea dakar, eta 2022an UGTk, CCOOk eta Estatuko Gobernuak sinatutako akordioaren ondorio da.
Gauzak horrela, ELAk bere eskumenak baliatzeko eskatu dio Eusko Jaurlaritzari. Horrela, Gobernuari eta euskal alderdiei eskatzen die Estatuko aurrekontuek Euskal Herrian langile publikoen soldata igoerak erabaki ahal izatea ahalbidetzeko. Eta EAEko aurrekontuetan %10eko soldata igoera aurreikustea, azken 3 urteetako KPIa bermatzeko, eta eduki hori negoziazio mahaietara eramatea.
Aldarrikapen hori jasota dago urriaren 25ean eta abenduaren 19an EAEko sektore publiko osorako egingo den greba deialdian. "Gainerako aldarrikapenekin batera erantzunik ez badu, greba dinamikekin jarraituko dugu. Lan baldintza egokiak bermatzea da zerbitzu publiko egokiak bermatzeko modurik onena", adierazi du ELAk.
Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
