AITEK Automation Azkoitian dagoen 80 langiledun makina-erreminta enpresa da eta lan-bolumen handiena Juaristi Boring and Milling enpresari eskaintzen dio, gerentzia partekatzen duelarik.

Duela zenbait hilabetetik hona nominak ez ordaintzea eta atzeratzea gertatzen ari dela leporatzen diote langileek eta, horrez gain, gaur egun lau hilabetera iristen dela eta langileen artean kobrantzarako diskriminazioak daudela baietatzen dute.

Era berean, Geroari egindako ekarpenen auzian, zorra urtebete baino handiagokoa da, eta gai hori judizializatuta dago. Langileen egoera gogaikarria da, eta jasanezina ere bada, antsietateak eta estresak eragindako baja mediko batzuek eta enpresaburuaren ez-betetze larriagatik kontratua amaitzea eskatzen duten eskaerek erakusten duten bezala.

Maiatzean ERTE bat planteatu du enpresak, arrazoi produktiboengatik, eta maiatzaren 19tik abenduaren 19ra bitartean %70era artekoa izango da. Batzordeak ez ditu ontzat eman alegatutako arrazoiak, hala ere, Asanbladaren aginduz enpresarekin akordio batera iritsi da ERTE ez inpugnatzeko, hobekuntza, neurri eta ordainketa berme batzuk mantentzearen truke.

Horren aurrean, Batzordeak (4 ELA 1 LAB) dei publikoa egiten dio zuzendaritzari, irtenbide urgenteak eta adostutako konpromisoak betetzea eskatuz, baita enpresaren etorkizunerako bideragarritasun plan erreal bat ere.