ELAk urtarrilaren 26rako deitutako greba orokorrak zaintza sektoreetan (adinekoen egoitzak eta eguneko zentroak, desgaitasun zentroak, tutoretzapeko etxebizitzak, etxez etxeko laguntza, esku-hartze soziala...) zaintza sistemaren publikazioa eskatzen du. Testuinguru horretan, ELAk Nafarroako Parlamentuan dokumentu bat erregistratu du, non talde parlamentario guztien inplikazioa eskatzen duen zaintza-eredua aldatzeko eta bide horretan adinekoen egoitzetarako lan-hitzarmena lortzeko.

Zaintza profesionalizatu gehienak pribatizatuta edo merkantilizatuta daude, enpresa pribatuen eta putre-funtsen esku, eta horiek lehentasuna ematen diote onura ekonomikoari, eta ez pertsonen zaintzari. Hori guztia, gainera, diru publikoarekin finantzatzen da.

Zaintzaren sektoreko profesionalen lan-baldintzak hobetzea ezinbestekoa da zaindu beharreko pertsonek arreta duina eta integrala izan dezaten. Gaur egun, Nafarroako adinekoentzako 70 zentro baino gehiago (egoitzen eta eguneko zentroen artean) estatu-mailako lan-hitzarmen batek arautzen ditu, zentro gutxi batzuk izan ezik, horiek enpresa-esparruko beren lan-hitzarmenek arautzen baitituzte.

Estatu mailako hitzarmenak, alde batetik, zerbitzuaren kalitateak okerrera egitea dakar; izan ere, 7 minutu baino ez ditu uzten pertsona bakoitzaren zaintzak betetzeko (88 minutu egun osoan), eta lan-baldintza guztiz eskasak ditu: 1..000 euro gordinetik beherako soldata, urtean ia 1.800 orduko lanaldia eta hilean asteburu bakar bateko atsedena.

ELAren iritziz, beharrezkoa da hitzarmen bat egitea Nafarroan adinekoentzako egoitzetarako eta eguneko zentroetarako, eta talde parlamentarioen inplikazioa beharrezkoa da, diru publikoak sostengatzen duen sektorea baita, eta Nafarroako Gobernuaren erantzukizuna zuzena baita.