Arazo horren eraginpeko langileek egin dituzten kexa ugariez gain, ELAk, prebentzio-arloko kontsulta bat aurkeztu zuen 2017an baina oraindik ez dugu erantzunik jaso. Egoera honen aurrean, 2018an, salaketa bat aurkeztu genuen Lan Ikuskaritzan.

Salaketaren ondorioz Ikuskaritzak errekerimendu bat igorri zion Deba Goieneko ESIko Zuzendaritzari, arazo hori konpondu zezan, ikuskapena egin ondoren, Ikuskaritzak gertaerak egiaztatu bait zituen: beroa legez ezarritako mailatik gorakoa dela.

Egoera larria izan arren, gaur egun, Osakidetzak ez du ezer egin arazoa konpontzeko. Langile batzuk, Ospitale zaharreko eraikineko kontsulta berrietara mugitu egin dituzte baina eraikin honek Arrasateko Osasun Zentroak dituen arazo berdinak edo are larriagoak ditu. Osakidetzak aurreikusi du langile gehiago mugitzea eraikin honetara, baina ez dago aurreikusita aire girotua instalatzea. Bero egun batean Kardiologiako kontsultan egondako edozein gaixok azaldu dezake arazoa larria dela, are gehiago, 30ºCrekin esfortzu aproba bat egin behar izan badu gaixoak.

Hori dela-eta, tinko eskatu behar diogu ESIari berehalako neurriak, behin betikoak, har ditzan, arazo horrek eragin zuzena baitu bertako langileen osasunean, eta baita zerbitzu horretara doazen gaixoen osasunean ere.

Beste osasun-zentro batzuetan ere arazo berberak daude, eta prebentzio-zerbitzuari gorabehera-orriak bidali zaizkio arazoaren berri emateko, baina Zuzendaritzak horrelako eskariei entzungor egiten die.

ESIko zuzendaritzak aire girotua daukaten bulegoetan lan egiten duen bitartean, langileek eta gaixoek etengabe pairatzen dituzte 30ºC baino gehiagoko tenperaturak, arduradunek inolako konponbiderik planteatu gabe.