2019-12-11 11:57
Greba deialdi berria iragarri dute sektoreko hitzarmen kolektiboaren negoziazioa desblokeatzeko bidean. Izan ere, beste behin salatu dutenez, Gipuzkoako Foru Aldundiak negoziazioa blokeatuta dauka: "Sektorearen %90 finantzatzen du, eta enpresen etekinak handitzea diruz laguntzen du, lanaldi partzialeko kontratazioa eta sektoreko langileen soldata-arrakala betikotzearen kontura". Gogorarazi dutenez, abenduaren 10ean ELAk Lan Harremanen Kontseiluan, Donostian, deitu zuen hiru aldeko bilerara ez zen agertu ere egin Aldundia. Gatazkan inplikatuta dauden aldeak zeuden deituta: Diputazioa, patronalak eta sindikatuak.

ELArentzat bereziki larria da Gipuzkoako Foru Aldundia bileran agertu ez izana, kontuan hartuta egun berean jakinarazi zuela 5 milioi eurorekin finantzatuko dituela UGTrekin gutxiengoan lortutako akordioa sektoreko langileei aplikatzen dieten egoitzak. "Aldundiak dio ez duela bilerara joan behar ez delako negoziazioaren parte; baina era berean, akordio bat finantzatzen du UGTrekin gutxiengoan, 2017. eta 2018. urteetarako soldatak izozteko, lanaldi partziala daukaten eta prekario dauden langileen %50 baino gehiago mantentzeko eta urteko 6.000 eurotik gorako soldata-arrakala finkatzeko". ELAko ordezkariek baieztatu dutenez, argi erakusten du horrek Aldundiak ondo dakiela bera ere badela gatazkaren parte, baina bere parte hartzea enpresaburuen etekinak handitzera bakarrik bideratu nahi duela.

Gatazkari irtenbidea bilatzeko, ELAko ordezkariak eta greban dauden langileak Gipuzkoako Senideak senide-elkartearekin ere bildu izan dira dagoeneko, eta horiek sektoreak Gipuzkoan bizi duen egoera larria partekatzen dute. Langileek 149 egun daramatzate greban.

 

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
ELA klase sindikatu abertzalea da, 1911n sortua eta egun 100.000 afiliatu dituena.