Ekainaren 7an izango da XIII. edizioa, ohiko martxa luzearekin eta laburrarekin. Aurtengo berritasuna erasoak salatzeko telefono zenbaki bat izango da.

Bilboko Konpartsak federazioak Txosnagane mendi-igoeraren XIII. ekitaldian izena emateko epea zabaldu du. Ekainaren 7an izango da ibilaldi neurtua eta izen-ematea doan eman daiteke bikoteka. 200 bikotek eman ahalko dute izena ekainaren 5era arte, bilbokokonpartsak.eus webgunean, edo ekainaren 7an martxaren hasiera puntuan, leku guztiak bete arte.

Txosnagane mendia hainbat izenekin da ezaguna: Biderdi, Ganetxiki eta Larrentxu, besteak beste. Pagasarri eta Ganekogorta gainen artean dago, eta 877 metroko altuera dauka. Aurten, iaz bezala, ohiko bide bietatik antolatu ditugu martxak, parte-hartzaileek aukeratzeko:

• Lehenengoa, luzea, mendian eskarmentua duen jendearentzat, 19,48 kilometrokoa (854 metroko goranzko desnibela). Goizeko 8:15ean dokumentazioa batu eta 15 minutu geroago irtengo da San Adrian auzoko eliza paretik.
• Bigarrena, laburragoa, 14,39 km (446 metroko goranzko desnibela). Parte-hartzaileek 9:15ean dokumentazioa batu eta 15 minutu geroago irtengo dira, leku beretik.

Helmuga Atxuriko Enkarnazio plaza izango da, eta auzoko jaiekin bat egingo du. Bertan, mendizaleek aurkituko dituzte indarrak berreskuratzeko eta behar den guztia; han bertan ere izango da parte-hartzaileentzako sari-banaketa, 14:45ean. Bikote irabazlea ez da helmugara arinen heltzen dena izango, baizik eta parte-hartzaile guztien bataz besteko denborara gehien hurbiltzen dena!

Sari banaketaren ostean, herri bazkaria izango da auzoko jaietako paella lehiaketa aprobetxatuta. Menua beganoa, halal eta gluten barikoa izango da, izena ematen dutenentzat. Bazkarirako tiketak Zirika herri gunean izango dira salgai, 7 euroan, Txosnagane aurreko ostegunera arte, hots, ekainaren 5era arte.

Aurten, edozein motatako eraso salatu ahal izateko, telefono zenbaki bat jarriko da eskuragarri izena emateko esku-orrietan. Partaideek zenbaki horretara deitu ahalko dute martxan eraso bat pairatuz gero, eta Bilboko Konpartsek erasoa kudeatzeko laguntza eskainiko diote.

Igoerarako izen-ematea Bilboko Konpartsen webgunean egin daiteke ekainaren 5era bitartean, (edo parte-hartzaile kopurua agortu arte) eta parte-hartzea doakoa da. Aurkitu lagun bat eta eman izena!

The post 2025eko Txosnagane martxarako izen-ematea zabalik appeared first on Bilboko Konpartsak.