EnpresaBIDEAk, ekonomia eta enpresa gaiak euskaraz jorratzen dituen hedabideak, Bai Euskarari Ziurtagiria eskuratu berri du. Lortu duen maila, zehazki, 'Zerbitzua Euskaraz' da. Maila honek egiaztatzen du bezero, erabiltzaile eta herritarrei zerbitzua euskaraz eskaintzen dietela. Era berean, diplomak bermatzen du atariak eskaintzen duen produktua bera (edukiak) edota antolatzen dituen jendaurreko ekitaldiak (adibidez, 'Business Hitzak' topaketak) euskaraz egiten direla.

EnpresaBIDEA ekonomia eta enpresa arloa euskaraz lantzeko hedabide gisa sortu bazen ere, ziurtagiria lortzeko prozesuak balio izan du “posizionamendu hori eta eguneroko jarduna erabat koherenteak direla bermatzeko”. Euskararen erabilerari dagokionez, misioa eta praktika bat datozela ziurtatu da.

Etorkizunari begirako konpromisoak

Ziurtagiria eskuratzea ez da helmuga izan, etengabeko hobekuntzarako abiapuntua baizik. EnpresaBIDEAko lantaldeak hainbat helburu zehatz jarri ditu datorren urterako, euskaraz lan egiteko eta zerbitzua emateko baldintzak indartzeko.

Hobekuntza horien artean nabarmentzen da “aplikazio informatikoen euskarazko erabilera sustatzeko konpromisoa”. Atariak helburu hauek urtebeteko epean betetzeko konpromisoa hartu du.

Elkarlana, ardatz

Bai Euskarari Elkartetik zorionak eman nahi dizkiegu EnpresaBIDEA osatzen duten profesionalei, euskararen normalizazioan, bereziki arlo sozioekonomikoan, egiten duten ekarpenagatik eta Ziurtagiriaren komunitatera batzeagatik.

Bereziki pozgarria da guretzat bi entitateen artean hasi dugun kolaborazio berria: hilero lan munduan euskarak duen presentzia eta garrantziaren inguruko edukiak partekatuko ditugu. Ongi etorri Euskararen Mapara!