[Itsaso Zubiria Etxeberria] Zazpi belar ukendu egin berria ez da iritsi zaharra gure etxera. Zorionekoak gu, gertuan baitaukagu Garbiñe Larrearen Sendabelarrek dakitena liburua erabiltzen duen lagun eskuzabalik. Liburu horretako errezetaren batek balio izan digu, lagunartean udazkeneko xaraberen bat egiteko aitzakian, bizpahiru bazkari egiteko ere. Eta oraindik liburu hau eskuetan hartzeko tarterik izan ez baduzu, hauxe da zure momentua, irakurle, laugarren argitaraldia inprentatik atera berria baita. Ez zaizu damutuko.
Begiko mina ematen zuten errata batzuk zuzenduta iritsi zaigu liburu berria. Hala esan du Larreak: “Bai, argitaraldi berria aprobetxatu dugu, horrek lasai uzten du bat beti”. Baina ez da aldaketa bakarra, 2021ean lehen liburu hura plazaratu zenetik hona izendapen zientifikoetan hainbat aldaketa izan dira eta izen botanikoen eguneraketa egiteko ere baliatu da aukera. Horretaz aparte, liburuak aurrenekotik laugarrenera ez du askoz aldaketa handiagorik: “Nik oso gustura gehituko nioke testu gehiago, zenbait sendabelarren kasuan kaxoian utzitako materialak ez baitziren gutxi. Baina ezin halakorik egin, asko aldatuko litzatekeelako liburua lehen ediziotik laugarrenera”, azpimarratu digu Larreak.
Harrera izugarria izan zuen lehen edizio hark. “Durangora lehen argitaraldi hartako liburu gehienak salduta iritsi ginen eta harridura itzela sortu zidan”, azaldu du egileak. Euskal Herri osoan zehar ibili da sendabelarrek dakitenaz hizketan, aurkezpenak egiten han eta hemen. “Irakurleak asko estimatzen duen liburua dela konturatu naiz, irakurtzeaz aparte, erabili egiten den liburua delako”, esan du. Kosmetikoak sendabelarrekin Larrearen azken argitalpenak hartu dio aurkezpenen lekua eta aspaldian honetan dabil, “baina lehen liburua beti dago presente, bai aipamenetan eta bai galderetan”, dio.
Udako patxada ez da batere garai txarra liburu honi heldu eta ukenduren bat egiteko.
The post Sendabelarrak ez dira modaz pasatzen appeared first on ARGIAren barrenak.