[Itsaso Zubiria Etxeberria] Inor ez da ilegala. Ez gara esateaz nazkatuko. Baina gaur ez natorkizu kamisetak eta poltsak saltzera, irakurle, mezua kalean zabaltzeko eta Mbolo elkarteari diru apur bat emateko balio duten arren, ez baitugu slogan batean geratzerik nahi; bizitzak baitaude mezu honen atzean. Paperena bezalako milaka bizitza. Pape Niang-en bizipenak argitaratu genituela (Pape Niang. Hasiera berri bat / Mikel Garcia Idiakez) sei urte dira eta bigarren argitaraldia du liburuak 2025ean.

2019 hartatik hona aldaketa ugari bizi izan ditu liburuaren protagonistak. Onak eta txarrak. Jada ez dabil Arteako nekazal kooperatiban, eraikuntzan aritu da lanean, Bilboko portuan logistikan… Bilbo ere ez du urte guzti hauetan bizitoki bakar izan, mugitu zen Gasteiza, Marsellara, Avignonera, Bordelera… eta itzuli da berriz ere Bilbora. Hil aurretik bisitatu ezin izan zuen aita gogoan, kontatu digu ezkondu dela tarte honetan, hainbestetan ukatu eta amestutako paperak lortu dituela… Aldaketa asko bizi izan dituenaren kontakizunen muina, baina, ez da aldatu, liburua oso aktuala da, aktualegia. Migrazio politiketan aldaketarik bada hoberako norantzan ez, behintzat; eta tamalez, bigarren argitaraldi hau beharrezkoa dugu oraindik. Pape sei urteotan hitzaldiak emanez ibili da, liburua aurkezten han eta hemen, bere bizipenak kontatzen ikastetxeren batean ere izan da, haur eta gazteek lehen ahotsetik entzun dezaten gure begien aurrean gertatzen ari dena, egiten ari garena.

Epilogoan azaltzen ditu xeheago Garcia etxe honetako kazetariak Pape Niangen sei urteotako mugimenduak, eta sarrera horretako lerro batzuekin itxiko dut gaurkoa, ez bainaiz ausartzen nire hitzekin kontatzera dioena. Uste baitut migrazioa bizi izan duenak bakarrik uler dezakeela eta jar diezaiokeela ahotsa benetan ondorengoari.
“Bai, aldaketetara ohituta dagoen gizona da Pape, baina hain urrun dirudien 2019 hartan garbi zuen ideia irmoa segurtasun berarekin berretsi digu 2025 honetan ere: “Noizbait Senegalera itzuliko naiz, nire herrialdera, eta ez naiz Euskal Herrira bueltatuko. Han geratuko naiz. Nire lurraldean. Eta hantxe hilko naiz”.

The post Pape Niangen kontakizunak 2025ean ere aktual appeared first on ARGIAren barrenak.