[Itsaso Zubiria Etxeberria] Abendua hilabete indartsua izaten da edozein salerosketarako. Badu zerbait urteko azken hilak, indarra dute, oraindik ere, Gabonek. Eta Durango? Ai Durango… hango stand-ak, idazleak, musikariak, sinadurak… buelta azkar bat eman Landakon, buruan genituenak erosi eta zer aitzakia ona izan den beti parrandarako!

Baina aurten non erosiko ditut han topatuko nituenak? ARGIAk fitxa asko jartzen ditu Durangoko apustuan. Beste ugarik bezalaxe. Orain zer egin aurrez aurreko azokarik gabe? Beste ate batzuk zabaltzen hastea besterik ez da geratzen eta, zortez, orain bi urte hasia zuen bidea indartzeko balio izan dio ARGIAri. Salmenta moduez gogoeta egitera eraman ditu egoerak eta salmenta-puntuekin harreman zuzena izatearen garrantzia berretsi dute. Herrietakoa indartzea.

Jabetuta egongo zara, irakurle, azken asteetan Erosi herrian kanpaina jarri duela ARGIAk martxan, astekariko publizitate orrian. Ez dut ezer berririk kontatzen esaten dudanean herri honetan euskal liburu eta antzeko zenbait produkturen banaketa kontzentratuta dagoela. ARGIA, ordea, bere produktuen salmentarako zuzeneko harremana lantzen ari da saltzaileekin. Bitartekaririk gabe. Denekin baldintza berdinetan.

Produktuetan duen aniztasunaren adinakoa du salmenta-puntuetan ere eta ARGIAren eskaintza topa dezakegu liburu-denda batetik hasi eta kale-saltzaileetaraino, tartean nekazarien kooperatibak edo loradendak, edo jostailu dendak bilduz. Bide asko dago jorratzeko oraindik, baina norabideak hori behar duelakoan daude. Salmenta puntuen sarea osatzen lagundu dezakegu guztiok: gure herriko denda kuttunetan ez badugu ARGIAren produkturik aurkitzen, dendariari eskatu ahal diogu ARGIArekin harremanetan jartzeko (679817354 zenbakira deituta edo okorta@argia.eus helbidera idatzita) eta berehala jasoko ditu produktuak, denda horretan salgai izateko.

Erosketak egitera joateko superfizie handiak egin eta bultzatu dituztenek, bertaraino autoz joateko parking zoragarriz hornitu dituzten horiexek, errepide sareak merkatari handiei begiratuz antolatutako hirigintza planekin borobilduz gaur arte merkatari txikiak odol-husten aritu diren berberek diote orain inoiz baino inportanteagoa dela herrian geratzea, erosketak bertan egitea. Mugikortasuna etetea da helburua, birusaren hedapena gelditzea. Ez besterik.

Inoiz baino inportanteagoa da herrian erostea, bai, baina herriak bizi behar duelako. Herrian lan, herrian bizi, herrian erosi. Gaur bai, baina bihar ere bai.

Erosi herrian edo erosi zuzenean ARGIAren Azokan.