[Itsaso Zubiria Etxeberria] Aurten ondo antolatu beharra daukat bisita. Ezin naiz lehengo urtean moduan tuntun aurpegiarekin itzuli etxera. Zakua liburu eta diskoz beteta bai, baina tuntun aurpegia ere urrutira ikusten zitzaidan abenduaren 7 hartan. Inor ez da ilegala jertse berria soinean eta ni ilegalena. Ezin aparkatuta hiru itzuli eman ondoren, nire burua engainatu ez nuen ba “tira, gaur ez dira isunak jartzen hasiko, kotxe pila dago-eta gaizki aparkatuta!”. Eta nik ere halaxe egin nuen. Baina ez kanpoaldean. Ez ez, berriz ere nire burua engainatu eta denbora justukoa nuela argudiatuta, Landako ondoko kalean, lotsagabe, espaloi gainean danba.

Aurten ondo antolatu beharra daukat bisita. Eta ez aparkatzeko bakarrik, erosketa-zerrendarekin joan nahiko nuke. Lagun batek esan zidan bera zerrendarekin eta azoka barruko ibilbidea aurrez pentsatuta sartzen dela Landakora. Hasi naiz lista osatzen. Oraingoz ARGIA, Bizi Baratzea eta Inor ez da ilegala dauzkat apuntatuta. Ibilbidea ere pentsatzen ari naiz, nondik sartu, ezker edo eskuinera jo, lehenengo kanpoaldeko bi kaleak igaro, erdikoa azkenerako utzi… Mapan markatu ditut izartxoekin nire puntu interesgarriak: ARGIA eta Bizi Baratzearen stand-ak betiko lekuan, Landako barruan, ez dakit mapan markatzeak ere merezi ote duen, kanaberei segitzea besterik ez baita –azokako puntu guztietatik ikusten dira ia sabairainoko landaretzarrak–; eta Landakotik kanpora, Inor ez da ilegala proiektuaren denda, Uribarriko Andra Mariaren basilikatik bertan –alde zaharreko eliza, alegia–, 50 metro eskasera, Goienkale 7. zenbakian.
Batean eskuratu nahiko nituzkeen nobedadeak, honakoak: Onintza Enbeitaren Bizitza baten txatalak liburua; Ilargia eta landareak 2026 urteko lanen agenda; Bizi Baratzea Orria urtarokaria; Gorka Bereziartuaren eta Adur Larrearen Abentura Erraldoia liburua; Data-Zarta denbora lerroa karta-jokoa; eta Erraldoi eta buruhandien karta-jokoa. Bestean, nobedaderik akaso ez, baina dagoeneko zarpailduta ditudan arropa eta telazko poltsa batzuk berritzeko aukera.

Salmentatik haragoko apustua
ARGIArentzat estrategikoa da Durangoko Azoka eta indar handia jartzen du egun horietan. Lantalde guztia izango da bertan eta harpidetza kanpaina ere jarri du martxan Zure babesa behar dugu leloarekin. Etxeko kazetari guztiak egongo dira postuan ARGIAren berri emateko, nahi duenari proiektua azaltzeko eta jada harpidedun direnekin hitz egiteko. Egongo da, noski, besteak beste Onintza Enbeita (abenduak 6, 17:30, areto nagusian liburu aurkezpena), Gorka Bereziartua eta Adur Larrea (abenduak 6, 10:30, Saguganbaran ipuin aurkezpena) Jakoba Errekondo (abenduak 6, 13:30, areto nagusian aurkezpena) eta Garbiñe Larrea kolaboratzaileekin mintzatzeko aukera ere. Komunitate osoarekin biltzeko aukera aparta.

Aurten ondo antolatu beharra daukat bisita…

The post Durangoko prestaketak hasi dira appeared first on ARGIAren barrenak.