Agin Rezola

Suizoak kontrako eztarritik

2010-06-17 00:33:00 | Agin Rezola

Suizoa kontrako eztarritik

H multzoko talderik ahulenak, Hondurasek, ongi etorria eman dio Txileri. Edukaziorik ez zaio falta aurrelariari behintzat (Welcome). Txiletarrak erasoan saiatu dira buru belarri, baina azkenean, gola hankaz sartu dute.
 
Euskaltzaindiari oharra: futbolean, espresio hau aldatu eta buru hanka saiatu dira esan beharko genuke, ez?
 
Hondurasi bere aurrelaririk onenak falta zitzaizkion, baina kontuak kontu, Txile gehiago izan da, futbol erasokorra erakutsi dute eta merezita irabazi dituzte 3 puntuak. Portzierto, gola Beausejour-ek sartu du. (Eskerrak idatzi egin behar nuen eta ez ahoskatu.)
 
H multzoko beste partidua Suitza eta Espainiaren artekoa izan da. Joko aldetik, Espainiak goitik behera menperatu du Suitza. Bueno, Suitza goitik behera edo behetik gora menperatu beharko da, lautadarik ez dago han. Ah bai! Senderos bat badago baina... Uste dut nahasten ari naizela.
 
Harira. Espainia joko aldetik hobea izan dela, baina ezin izan dutela golik sartu. Suitzarrek ongi eta gogor defenditu dute eta azkenean, Iniestari, bokal bat ere kendu diote. Orain “Ni esta” esaten diote.
 
Beste galdera bat. Bixente Basokok (Vicente Del Bosque) Iniestaren ordez Pedrito atera duenean, zu ere Heidiren bila hasi zara Suitzaren zelaian?
 
Gaurko azken partiduari buruz (A multzoko Hegoafrika - Uruguay) ez dakit zer esan. Tira, antzemango zenuenez, beste guztiei buruz bezala. Onena zentzuzko zerbait esatea izango da: Uruguayk 3 eta 0 irabazi du, 3 gol sartu dituelako eta Hegoafrikak ez duelako golik sartu. (Ederki ari haiz Agin, laster ETB 1eko partiduak eskainiko dituk).

Espainia 0:1 Suitza

Uruguay 3:0 Hegoafrika

Honduras 0:1 Txile