PPren eskariz Aiaraldea hedabidearen hitzarmena eten du EAJk Artziniegan aurrekontuak onartzeko

  • 1.8 milioi euroko aurrekontua izango du Artziniegako Udalak. Udal aurrekontua babestearen truke, baldintza bakarra jarri du PPk: Aiaraldea hedabidearen hitzarmena eta publizitatea kentzea.

Apirilaren 12an izan da udal bilkura. Argazkia: Aiaraldea
Artikulu hau CC BY-SA 3.0 lizentziari esker ekarri dugu.

2018ko apirilaren 13an - 09:21

Gaur goizeko udalbatzan onartu dituzte 2018ko udal aurrekontuak. Guztira, 1.8 milioi euroko aurrekontua izango du Artziniegako Udalak, “iaz baino %2.2 gehiago”. Iñigo Gomez alkatearen esanetan, 139.000€ gehiago izango ditu gobernu taldeak inbertsiotarako. 

2018ko inbertsioak

Udal aurrekontutik eratorritako proiektuen artean nabarmendu dituzte ur edangarriaren tutu sistemaren ordezkapena (600.000€), igerilekuetako ur sistema zein atseden gunea atontzea (300.000€) edota Garai plazako autobus geltokia hobetzea (35.000€). Horrez gain, Eusko Jaurlaritzako diru-laguntzarekin berrituko dituzte Arteko Gure Ama ikastetxeko kolunpioak (19.000€). Kultur arloan 1.500 euro gorde dituzte Benjamin Respaldizak Alde Zaharra eskulturaz josi dezan.

Udal aurrekontuak onartzeko ezinbestekoa izan da EAJ eta PPren arteko akordioa, udal gobernu taldeak PPren babesa behar baitzuen proposamena onartzeko. PPren baldintza bakarra Aiaraldea hedabidearen hitzarmena kentzea izan da, eta inolako diru-partidarik ez ematea, ezta publizitatean ere.  

Euskara sustatzeko laguntzak, behera

Hala, euskararen sustapenerako proiektuetara 4.500€ bideratuko ditu Udalak: Euskararen Astera eta bestelako jardueretara, hain zuzen. Horrez gain, euskara ikasi nahi dutenentzat beken bidez banatuko dira 2.300€. Ildo beretik, euskararen erabilera areagotzeko 375€ baliatu ahalko du Aiarako Kuadrillak. PPko eskaerari men eginez, ordea, euskararen normalizazioa bultzatzeko Aiaraldea hedabidearen hitzarmena bertan behera utzi du gobernu taldeak.

Aiaraldea hedabideak 1.500 euroko diru-laguntza jaso izan du azken 7 urteetan euskal hizkuntzaren sustapenean egiten duen lanagatik, biztanle bakoitzeko 0.60 euro. Alabaina, eten egin dute hitzarmena. Bazkide eta erakundeen finantzaketari esker ditu martxan, besteak beste, euskara hutsezko Aiaraldea Gaur hedabide digitala eta Aiaraldea Hemen egunkaria. Artziniegako Udalak hartutako erabakiak eskualdeko udalerri guztietan adostutako hitzarmena apurtzen du.

Jeltzaleek Batzordean aurrekontua ez defendatzea leporatu diote EH Bilduri. PPk bere jarrera berretsi du. Hala, 1.500 euroko diru saila bestelako proiektuetara bideratzea proposatu dute udal aurrekontuan: Gurutze Gorrira, DYAra eta euskara ikasteko beketara. Euskararen normalizaziorako gakotzat jo du komunikabidearen lana EH Bilduk, eta gogor gaitzetsi du erabakia: “Beto argi bat da, erabaki guztiz antidemokratikoa. Partida hori kentzea izan da PPko zinegotzi bakarrak jarritako ezinbesteko baldintza bozketan abstenitzeko, eta EAJk bere aurrekontuak aurrera ateratzeko”. Larritasunez agertu du kezka koalizio abertzaleak: “EAJk artziniegarren aurrean justifikatu beharko du euskararen sustapenaren aurka doan erabakia, Artziniega Aiaraldeko gainontzeko udaletatik aldentzen duena, eta eskualdeko euskarazko komunikazio-proiektu bakarrari oztopoak jartzen dizkiona”. Arkaitz San Jose zinegotziak erantsi du, hamabostean behin herriko guraso guztiengana iristen direla Artziniegako eta eskualdeko berriak hedabideari esker: “Aurreikusita zegoen diru-laguntza kentzea oso larria da. EAJrena da erantzukizun osoa. Eskola edo bazkidetza bidez Artziniegako auzo guztietara iristen da komunikabidea, euskararen erabileran laguntzen du nabarmen”.

Bideak eta espaloiak konpontzeko eskaera

Bestalde, Artziniegako bideen egoera izan dute mintzagai osoko bilkuran, horietako asko egoera txarrean baitaude. Ildo beretik, herriko zenbait espaloiren gabezia nabarmenak aipatu dituzte oposizioko taldeek; baita herritarrek ere, galderen tartea ireki denean. Usoek eragindako tira-birak ere jorratu dituzte udalbatzan. Frontoiko kristalen konponketei dagokienez, obra bukatzeko ezinbestekotasuna azpimarratu du EH Bilduk, euriteen ondorioz artziniegarrek beste herrietako azpiegiturak erabili behar baitituzte bien bitartean.

Gure Esku Dago eta pentsionisten mozioa

Bestalde, hainbat mozio aurkeztu dituzte bilkuran. Maiatzaren 6ko herri galdeketen harira, Aiaraldea Bat elkartearen deialdiarekin bat egin du Udalak, PPk kontra bozkatu badu ere. Halaber, pentsionisten afera ere izan dute eztabaidagai, baita Herrialde katalanetako egoera politikoa ere. 

Albiste hau Aiaraldeak zabaldu du eta Creative Commons lizentziari esker ekarri dugu.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude