Urtero-urtero ehunka mila istripu baino gehiago gertatzen dira etxeetan. Bizkor eta zentzuz jokatzea funtsezkoa da kasu horietan.
Etxean gertatzen diren istripuen artean erorikoak dira usuenak (%41), baina horiez gain oso arruntak dira ebaki eta urratuak (%23), kolpeak, takatekoak (%13) eta erredurak (%10), Espainiako Osasun eta Kontsumo Ministerioak argitaratu duen Etxeko eta aisialdiko istripuen detekzioa izeneko txostenaren arabera. Zer egin behar den eta zer saihestu behar den jakitea ezinbestekoa da istripua larria izan ez dadin.

Erredura arinak

Garrantzitsuena ur hotz ugarirekin bustitzea da, zauria txorrotaren azpian denbora luze samarrean mantenduz, eta larruazalera itsatsi ez bada bakarrik kendu arropa. Kortikoidea duen krema bat eman daiteke zaurian gaza bat erabilita, baina erredura aurpegian, lepoan edo genitaletan badago ez da inoiz estali behar.
Babaren bat agertzen bada, ez saiatu hura lehertzen edo irekitzen bertako likidoa ateratzeko, infektatzeko arriskua dago eta. Zoaz larrialdietara erredurak anpoilak, puslak edo babak badauzka, edota kolorea zuria, belzkara edo marroia bada; baita erredura oso handia bada ere, noski.

Ebaki txikiak

Garbitu ondo ingurua, xaboi eta ur ugarirekin, edo serum fisiologikoarekin. Ondoren estali gaza batekin, odoljarioa eten arte. Ez saiatu sekula odoljarioa alkoholarekin geratzen. Alkoholak, baita farmaziakoak ere, odol-hodiak ireki egiten dituenez, zauria buxatzea eragozten du.
Ebakiak odol-galera handia eragin badu, edo odoljarioa, txikia izan arren, ez bada geratzen, joan berehala larrialdietara, zauria zanpatzeari utzi gabe.

Zerbait kontrako eztarritik joatea

Janari zati bat beste pertsona baten eztarrian trabatuta geratu bada eta arnasteko zailtasuna baldin badu, jar zaitez haren atzealdean eta inguratu gerrialdea besoekin, azkeneko saihets-hezurraren parean. Jarri eskuineko eskua, itxita, sabelaren gainean, eta beste eskua bularraren beheko aldean, bata bestearen gainean. Sakatu gogor eta bat-batean, gorantz, bi eskuekin. Hori egin ondoren, gaixoak ez badu janari zatia kanpora bota, deitu larrialdiei. Ez da komeni bizkarrean kolpeak jotzea, nahiz eta kolpe arinak izan.

Deskarga elektrikoak

Ez ukitu erasandako pertsona zuzenean, elektrizitatea batetik bestera igaro ez dadin. Halaber, eten korronte elektrikoa berehala, deskarga gerarazteko, edo aldendu erasandakoa indar elektrikoaren iturritik, egurrezko edo plastikozko objektu bat erabiliz, kontakturik egin ez dezan. Estali manta batekin deskarga elektrikoa jasan duen pertsona, eta eskatu laguntza berehala.

Produktu toxikoak irentsi

Lixiba, amoniakoa edo antzekoak badira, ez da komeni gorakoa eragitea, ahoko eta eztarriko ehunek berriro ere substantzia horiekin kontaktua izango luketelako. Onena informazio toxikologikoko argibideen telefonora deitzea da, larrialdietara joan aurretik.