I
Laster EGA emango zaionez
merezi ez duen horri,
gure hizkuntzaren hobe beharrez
test bat nahiko nuke jarri.
Izan dadila “ez dakitenen”
gabeziaren neurgarri...
eta “dakiten” batzuei ere
baietz primeran etorri!

IV
Hauetatik zein ez da zuzena
1) hala biz ala 2) hala bedi,
1) hobea ala 2) hobeagoa,
1) komeria ala 2) komeri,
1) hori guztia ala 2) guzti hori,
1) inauteri ala 2) ihauteri
1) polizia etxe, 2) komisaria
edota 3) komisaldegi?

II
Hiru hitz zerrenda hauetatik
esan zein ez den okerra:
1) Ospitalea, halitosia,
suspertu, hautsi, platerra.
2) Ziur, jardun, urrun, harmonia,
zizarea, Inglaterra.
3) Exijitu, armonia, ziza,
zerra eta motozerra.

V
“Gauzak”, “pertsonak” eta “egiak”
zer da ezin dutena jasan?
“Auhendatzeak ez du merezi”
ez esan, ez hemen, ez han.
“Aldea beti prezioan datza”
pluralean nola esan:
“alde__ beti prezioan ______”,
bestela ezin da izan.



 

III
Honako hiru esaldietan
bakarra da zuzenena:
1) Euskalduna da gure hizkuntzaren
alde borrokatzen dena.
2) Euskalduna da erromerian
gogoz dantzatzen duena.
3) Euskalduna da euskarak duen
oztopo nagusiena.

VI
Euskal herritar denek euskaraz
erruz egingo balute,
azterketarik ez egitea
aise ulertuko nuke,
baina sasoia baino lehen EGA
oparitzearen truke,
gure hurrengo belaunaldiek
hobeto hitz egingo al dute?