Duela 26 urte argitaraturiko komikiaren berrargitalpena dugu liburu hau. Mitxel Muruak testuaren egokitzapena egin du eta Galtzagorri elkarteak Eusko Jaurlaritzaren Hizkuntza Politikarako Sailburuordetzarekin batera bultzaturiko Klis-klasikoak sailaren barruan argitaratu da.

“Abrite portas klis-klas”, Arratibelen ipuinetako esamolde hartatik abiatuta Klis-klasikoak izena duen bilduma honetan euskarazko haur eta gazte literaturaren kanon bat sortu nahi da, gurean klasikoak, gure literaturako obra esanguratsuak plazan izateko asmoz sorturiko bilduma. Egungo merkatuan literatura berria, nobedadeak soilik baitaude presente; eta duela urte batzuk argitaratutako kalitatezko liburu asko eta asko erdi galduak dauzkagu. Alde horretatik pozgarria da “Klis-klasikoak” sail honek egindako lana kalitatezko lan horiek berreskuratzeko; eta gainera, ohiko topikoetatik at, plazaratu dituzten lehen lau aleetan oso liburu ezberdinak aurki ditzakegu: ipuin bat, haur folkloretik abiatutako testu laburren bilduma, nazioarteko ipuin klasiko baten itzulpena eta komiki bat. Azken hori dugu, hain zuzen, Indianoa lana.

Komiki hau XIX. mende erdi aldean dago kokatuta (1849ko urrian abiatzen da istorioa, San Franciscorantz doan itsasontzi batean) eta Kaliforniara doazen bi euskaldunen kontaketa dugu. Hasieratik bertatik abentura kutsua duen bidaia dela nabari dezakegu; itsasontzia lehorreratzerakoan bertan hasten baitira gure bi lagunen abenturak: barkuan bertan eraso eta preso hartzen dituzte, lehorreratzerakoan salaketa faltsua leporatu, ondoren traizioa jasan… Juliok eta Bernardok hamaika abentura bizi dituzte azken honen anaiarekin bat egin aurretik. Mendebaldeko istorioen kate bat dugu liburua, lapurrak, ganaduzaleak, urre bilatzaileak eta beste hamaika pertsonaia agertzen dira di-da batean irakurtzen den liburu honetan.

Euskal irakurleak, gainera, gure arbasoek Ameriketan egindakoen berri ere izan dezake. Zer nolako lanak, ohiturak, eguneroko borrokak eta zailtasunak izan zituzten aurrera egin ahal izateko. Alde horretatik abenturazko komiki honek ere badu gure nortasuna eta gure historiaren berri.

Liburuaren hitzaurrean Murok adierazten du liburu hau hobeto ezagutzen laguntzen duen hainbat pista. Hor dago, esaterako, R. L. Stevensonen eragina, Mendebal Urrunari buruzko filmak, baina baita, arestian aipatu bezala, euskal ukitua: egilearen familiaren historia, hain zuzen (nahiz eta azken hau, batik bat Justin Hiriart komiki ale zoragarrietan ageri).

Zalantzarik gabe, Indianoa gure literaturako perla bat da, lehendik ezagutzen genuenok berriro gozatzeko aukera izan dugun bezala irakurle berriek esku artean izateko moduko liburu zoragarria.