Egun Interneten dugun abiadura eta orain hamar urte zegoena ezin dira alderatu. Ordenagailuek, dispositiboek, kableek eta abarrek izan duten hobekuntzari esker gero eta informazio kopuru handiagoa atzitu edo transmititu dezakegu gero eta denbora tarte txikiagoan.

Hala ere, egungo tresnen optimizazioarekin abiadura hobetzeak bere muga izango du hemendik gutxira: hobekuntza teknologiko batek abiadura pixka bat handitzea baino ez du eragingo. Nola eman, bada, jauzi kualitatiboak Interneten abiaduran?

Ikerketa bat baino gehiago egiten ari bada ere, guk hemen baten aldeko apustua egingo dugu. Grafenoaren aldeko apustua, hain zuzen. Grafenoa 2004an aurkitu zuten Manchesterreko Unibertsitatean (Erresuma Batua), karbono atomo geruza bakar batez osatutako materiala sortu zutenean. Orduz geroztik izugarri ugaritu dira beraren aplikazioak. Oraingoan, Interneten abiadura ehun halako bihurtzeko bidean jarriko gaitu.