Frantziako Ademak (Ingurumenaren eta Energiaren Kontrolerako Agentziak) interesgarriak iruditu zaizkigun aholkuak eman berri ditu informatikako tresnen erabilerari dagokionez. Egun, teknologia berrien erabileragatik Europako berotegi-gasen emisioak %2 dira gutxienez, eta esponentzialki hazten ari dira. Beraz, hain libreki erabiltzen ditugun e-postek, webek eta abarrek gero eta erantzukizun handiagoa dute gure Lurraren berokuntzan. Hona hemen, bada, hainbat aholku sistema informatikoen erabilera ahalik eta garbiena izateko.

2009an munduan 250.000 milioi e-posta bidali ziren eta 2013an 500.000 milioi izango dira. Alor honetan aholkatzen dena: Behar diren mezuak baino ez bidali. 100 pertsonako enpresa batean mezuen kopurua %10 murriztuz, urtero tona bat gutxiago CO2 emitituko litzateke.
Behar diren mezuak baino ez gorde. Zerbitzari handiek munduko energia elektrikoaren %1 kontsumitzen dute eta emititzen duten gas kantitatea nazioarteko aireko trafikoaren adinakoa da.

Ez inprimatu ordenagailuan hamar edo hamabost minutuan irakurri ditzakezun mezuak, eta inprimatzekotan, zuri-beltzean eta orrialde bikoitzean egin.

Web-kontsultetarako ere bada aholkurik: Bilaketetan ahalik eta zehatzenak izan, horrela orri eta zerbitzari gutxiago kontsultatu eta lanean jarriko dira. “Faboritoak” edo lastermarkak erabili edota zuzenean jo edo idatzi topatu nahi den web-helbidea. Ahalik eta gehien luzatu ordenagailuaren bizitza. Hau da, ez aldatu urtero.

USB giltzen erabilera ere izugarri areagotu da azken urteotan. Adibidez, gero eta enpresa gehiagok egiten du publizitatea USB bidez. Erabili USBak beharrezkoa den kasuetan, katalogo astunen kasuan edo oso informazio pertsonalizatuen kasuan. Adibidez: 100 orriko txostena pasatzeko onena e-posta da, eta berori irakurtzeko pantailan baino hobe da bi orrialdetan eta zuri-beltzean inprimatzea.