I
Bizitzan eman eta jasotzen
diren muxu ta laztanak,
kontaezinak izan daitezke;
aldi berean bakanak.
Nahiz eta sarri bat gogoratu
ta ahaztu beste danak,
ohartzen gara indartsuenak
direla aita ta amak
eskatu gabe emanak.

 IV
Nahiz filmeetan hala ikusi
ezin da mitoez fido,
lehen muxuan emozioa
bihurtzen baita bertigo.
Baina orduko kili-kiliak
sabelean maitekiro,
desio dugun norbaitengana
hurbiltzen garen aldiro
senti daitezke berriro.

II
Gerora eskolan norbait minduta
haserrearen haserrez,
maisuak muxu emanaraziz
konpontzen gintuen errez.
Baina lotura afektiboak
norberarenak direnez,
inork esanda kolpe handirik
eman behar ez den legez,
muxu txikirik ere ez.

V
Ikasi arren leialtasuna
dela biko baten ardatz,
nori ez zaio tentaldiari
eustea egin inoiz gatx?
Muxu batekin hurbilduz ezpain
debekatu haietarantz,
unean horren gozoa zena
bihurtzen dela ez ahantz,
biharamunean garratz.

III
Loti Ederra ta Edurne Zuri
bi printzesa peto-peto,
zaldunen baten muxuaren zain
desioa noiz beteko…
Umetan hori saldu ziguten
baina orain gaude hobeto,
emakumeok ez dugu behar
gizonik dagoeneko
lozorrotik esnatzeko

VI
Eman gabeko muxuak baino
txarragorik ez da usu,
aitona, ama, betiko lagun,
maitale edo lehengusu...
Nahiz bere ondora hurbiltzerako
mundua ikusi lausu,
bizitza osoan zalantzarekin
geratu nahi ez baduzu,
emaiozu behingoz muxu!