Tariq Ali 1943an jaio zen Lahoren –gaur egun Pakistan, artean Britainia Handiaren menpeko India–. Gaztetan Erresuma Batura jo zuen, Oxfordeko Unibertsitatean ikastera eta geroztik hainbat borrokatan parte hartu du. Vietnamgo gerraren aurkako mugimenduan zaildu zen eta ezaguna da afera horretaz Henry Kissingerrekin izan zuen eztabaida. Munduari ezkerretik begiratzen dio, publikatu dituen liburuei erreparatzea besterik ez dago. Azkenekoan (Obama sindromea, 2010) AEBetako presidente berriaren politikak gupidarik gabe aztertzen ditu.