Orain arte Hubblei buruz argitara emandako informazio gehienetan iraganaren edota oraingoaren berri eman izan da. Baina Omega Centauri mulko globularrari egindako argazkien bidez mulko hori osatzen duten izarren ibilbidea datozen 10.000 urtetan zein izango den zehazterik izango da.

Centauro konstelazioan dago Omega Centauri, eta Ptolomeok topatu zuen orain 2.000 urte. Haren ustetan izar bat zena, gerora jakin dugunez, hamar milioi izar grabitate-gune komun batekiko biraka ari diren gunea da. Bertan aldaketak antzemateko lau urte behar izaten dira.

Hubblek 2002 eta 2006 urteen bitartean ateratako irudiei esker, mulkoa osatzen duten izarren higidurak aztertu eta hurrengo 10.000 urteetan izango duten portaera aurreikusi ahal izan da. Lurrean kokatutako teleskopio batek 50 urte behar izango lituzke halako irudiak egin ahal izateko.