Txertoa argitaletxeak Nor da? izeneko saila dauka pertsonaia historikoen bizitzak haur eta gazteei hurbiltzeko. Gaur hizpide dugun liburua Victor Vilardell Balasch-ek idatzi du 9 urtetik 12 urtera arteko haurrentzat eta Miren Arratibeli esker daukagu euskaraz irakurtzeko plazera. Simon Bolivar askatzailea liburuan aitona Simon bihurtu da eta narratzaileak gogoratzen duenez, asko gustatzen zitzaion aitona Simoni kontu kontari aritzea. Gutxien esperotakoan hamaika istorio kontatzeko gai zen. Edo historia esan beharko genuke? Izan ere, Simonen kontakizunak bene-benetakoak ziren: txoriak kaiolatik askatzen hasi eta kontinente osoa askatu zuen gizonaren historiak.