Emakumeak borrokan

Melodia haizagailuaren baliozkotasuna

  • Siroka ::Haize berriak

    MusikHerria

    iraupena ::29´29´´

    prezioa ::5€

Iker Barandiaran @IkerBarandiara
2010ko urriaren 17a
Haize bitxi hau Ugao-Balmaseda ingurutik dator eta berri samarra bada ere, partaideak aurretik Kloratita, Keats, Feos pero Majos, Apurka eta bestelako hauspoetan ibiliak dira. Aipatutako esperientziak gogorragoak izan badira ere, honakoan melodia nabarmeneko rock askeago eta leunago baten alde egiten dute lan. Mariaren ahotsak darama ontziaren lema eta instrumentuak bigarren mailan gelditzen dira azpitik askotariko sonoritateak marraztuz: pop-a, rock gogorragoa, punk-rocka, punk-pop-a eta metal tanta neurtu batzuk. Bestalde, abesterakoan tempo desberdinak aukeratzen dituzte, abestuz, errezitatuz eta inoiz rapeatuz. Eta ezin ahaztu, abesten dutenean zabaldu nahi duten mezuari berebiziko garrantzia ematen diotela eta maila askotako burujabetasunaren aldeko korrontean eragiteko idazten dutela.

www.myspace.com/sirokataldea
Siroka
Obamari edo Bushi ez diogu zertan kantarik egin; gurean bada kritika nori zuzendu

Mariaren ahotsa instrumentuen gainetik dago nabari. Mezua da garrantzitsuena?


Bai, jakina. Musikaren bitartez gure ekarpena egiten saiatzen gara. Musika bozgorailua da eta gure haserreak, ideologia, itxaropenak eta borrokak kontatzeko erabili nahi dugu. Baina egia da baita ere musikari, estiloari eta gure irudiari garrantzi handia ematen diogula.


Melodia gabe ez dago iraultzarik?


Bai, egon badago. Baina iraultza egiteko molde ezberdinak egonda, musikalki ere aukera zabala existitzen da. Taldeko mutilok orain arte eremu zaratatsuagoetan aritu bagara ere, beti gustatu izan zaigu gauza berriak probatzea. Mariak sortzen dituen melodiak eta abesterakoan duen jarrera, gure musikaren gordintasunari elkartuta, iraultza egiteko oinarri onena izan daiteke.

Maitasuna eta gorrotoa askotan eskutik doaz?


Zerbait edo norbait maitatzen ez baduzu, zaila da axola ez zaizun zerbaitengatik gorrotoa sentitzea. Guk gauza asko maite ditugu. Gure lagunak, herria, familia, ingurunea, izaera, musika, kultura, askatasuna... Lagunak bahitzen dizkigutenak, herria zanpatzen dutenak, gure izaera moldatu nahi dutenak, sakabanatzen gaituztenak, beraien onuragatik baino jokatzen ez dutenak, debekuak ezartzen dituztenak... gorroto ditugu eta horrela adierazten dugu gure kantetan.

Sahara gabe bada Siroka? Eta Euskal Herria gabe?



Sahara eta Euskal Herria bezalako herri zapalduek izaera propioa dute, eta izaera horren arabera biziraun dute inguruko estatuek beraien aurka bideratutako gorroto guztiaren gainetik. Sirokan ere, izaera eta jarrera definitua duen talde gara. Ez diogu Obama edo Bushi kantarik egin behar, hemen gurean badugulako zer esan eta nori zuzendu gure kritika, maitasuna edo gorrotoa. Sirokak ere Saharak eta Euskal Herriak bizirauteko izan duten kemena izatea nahiko genuke; hala bedi!
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
ASTEKARIA
Azkenak
EGILEA
Eguneraketa berriak daude