AEBetan haizearen indarretik eratortzen den energia, osoaren %2 baino ez da. Bertako administrazioak 2030erako asko handitu nahi du portzentaje hori, baina MIT ikerketa-zentro ospetsuko ikerlari talde batek kontuz ibili beharra dagoela ohartarazi berri du.

Ron Prinn eta Chien Wang ikerlariek milioika turbina eoliko lehorrean zein itsasoan jarriz zer gertatuko litzatekeen jakiteko eredu informatiko konplexua erabili zuten. Horren arabera, lehorrean kokatutako turbina eolikoek batez beste gradu batean handitu dezakete inguruko tenperatura; itsasoan jarritakoek, aldiz, gradu bat gutxitu. Gainera, haizeak ez duenez beti jotzen, eta ez beti indar beraz, horniketa elektrikoa ziurtatzeko gas naturalean oinarritutako zentral termikoak eraiki beharko lirateke. Halere, Prinnek eta Wangek ez dute nahi euren ikerketa energia eolikoaren kontrako argumentutzat hartzea; parke eolikoak eraikitzean kontuan har dadila, besterik ez.