Albert Camus (1913-1960) idazle eta filosofoaren arrastoak frantziar ospetsuen Panteoira eramatea proposatu du Nicolas Sarkozy presidenteak, Nobel saridunaren heriotzaren 50. urteurrena bete berri denean. Idazlearen seme-alabek harriduraz hartu dute Camusen hilobia aldatzeko proposamena. Batetik, aitari omenaldia egin nahi izatea eskertzen dute. Baina zalantzak dituzte omenaldirik egokiena ote den, aita beti handikeria eta ospea saihesten ahalegindu baitzen. Sarkozyren protagonismorako grina ezagun dute, eta presidenteak ekitaldia bere onurarako erabil dezakeela uste dute.