Txingurriekin elkartzeak on dagien landareen artean Acacia generoko espezie batzuk badira Amerikan. Acacia collinsii bezalako benetako akaziak, ez geure sasi-akazia, Robinia pseudoacacia. Elkar mainatuz, akaziek elikagaiak ematen dizkiete txingurriei eta hauek landareak zaindu, babestu eta kontu egingo dituzte.

Akaziak bere babeserako ditu arantzak, galantak arantzak, eta txingurriek arantza horiek zulatu eta mamia jango diote. Horrela, arantza lehortu eta gogorrago egingo da, animalia belarjaleetatik zuhaitza hobeto babestuz. Era berean, hustutako arantza horietan bertan ostatu hartuko dute txingurriek. Zazpi cm3 dute, gutxi gehiago, arantza zulook eta 30.000 inguruko txingurri hiria osatzeko adina arantza bereganatuko dute. Landarea ederki zainduko dute, inguruak etengabe patruilatuz. Beste intsektuek, onddoek, landare igokariek... elorrio dute akaziarengana hurbilduz gero. Zuhaitzaren enborraren bueltan lurra ondo izakituta, inongo landarerik gabe garbi mantentzen dute. Akaziak, ordainetan, mantenu osoan izango ditu txingurriak, majo elikatuta. Nola gainera! Zuhaitz gehienena bezala, akaziaren ahulgunea hostoa da. Biguna, hozkadaka erraz erauztekoa, gaitza erraz sartzekoa... Bada hortxe, hostoetan jarriko dizkio akaziak txingurriari haien zaintzaren ordainetako txerri-muinak, eta ez nolanahikoak! Hostoaren txortenean eta mutturrean garatzen dituen lupu edo koxkorretan nektarra, bestelako karbohidratoak eta koipeak pilatzen ditu landareak, txingurrien gozagarri.

Arantzetan txingurriak dituzten akaziak, ez dituztenak baino lasaiago bizi dira. Adibidez, belarjaleengandik babesteko fenolak eta tankerako gai gutxiago ekoizten dute.