Coloradoko Unibertsitateko (AEB) ikerlariak, NASArekin batera, komunikaziorako teknologia berri baten bila ari dira Nazioarteko Espazio Estazioan. Teknologia horren bidez, Lurreko Internet espaziora eta eguzki-sistema osora hedatu nahi dute.

DTN deitu diote teknologia berriari, eta haren bidez, NASAk eta bestelako nazioarteko espazio-agentziek Lurretik kanpo dauden ibilgailuekin Internet bidezko komunikazioa izango dute.

Egungo Interneteko teknologia ez  da aproposa espazioan aritzeko, planeten arteko distantziak, ibilgailuen orbitak eta komunikazio-seinaleak ez baitira egoki ezkontzen teknologia horrekin. Espazioko baldintzek behartzen dute Lurraren eta espazio-ontzien arteko komunikazioa puntutik puntura egitera, walkie-talkiekin egiten den antzera, eta horrek lotura bakoitza eskuz egitera behartzen du. Abian dagoen ikerketarekin oztopo horiek gainditzeko modua lortu nahi dute.