“Egungo euskal literaturaren irakaskuntzak ez du curriculum-legearen helburu bat bera ere lortzen”. Ondorio horretara heldu da Idurre Alonso (Eibar, 1978) Mondragon Unibertsitateko irakaslea, Batxilergoko euskal literaturaren irakaskuntzari buruzko tesiaren egilea. Euskal Herriko Unibertsitateko Patxi Juaristi eta Jon Batti Kortazar irakasleen zuzendaritzapean egin du tesia Alonsok.
EHUk plazaratutako prentsa oharrak dioenez, “literaturaren historia zentro batzuetan bakarrik irakasten da, eta narratibaren alorreko idazleak bakarrik”. Bestalde, irakurtzea proposatutako lanen % 96 narratibakoak dira, “nahiz eta horiek irakurtzearen helburua ez den ez komunikazio-gaitasunak garatzea, ez irakurketarako zaletasuna sustatzea –irakurketaren segimendu bakarra lana irakurri dela frogatzeko kontrol bat besterik ez egitea da horren erakusgarri–”. Azkenik, klasean egiten diren ariketa gehienek “eduki kontzeptualak finkatzea” dute helburu bakarra.