Lastategitik erabiltzaileak Tiraka.net blogean ondokoa idatzi du: “Erdarazale uniformistek, espainolek bereziki, sarri askotan erabiltzen dute euskararen zailtasunaren, exotismoaren, isolamenduaren, berezitasunaren eta beste zenbait ‘tasunen’ argudio faltsua, euskaldunen hizkuntza iraganeko bitxikeriatzat jotzeko xedez. Bada, hala ere, euskaltzale izan arren amarru horretan erortzen denik, hanka aldakaraino sartuz”. Eta Garak, Idoia Erasok Claude Hagegeri egindako elkarrizketa hartu du adibidetzat. Elkarrizketaren goiburua eta galdera batzuk nabarmendu ditu:
 
- “Euskararen sintaxia oso exotikoa da europarrarentzat” (goiburua).
 
Galderetako batzuk:
 
- Baina guztiek ez dute lortzen hizkuntza bat ikastea. Euskara ikasteko, adibidez, batzuek arazo asko dituzte.
 
- Zein dira beste hizkuntza ergatiboak munduan?
 
- Zerk egiten du hizkuntza desberdin besteengandik?
 
- Fonetikari dagokionez, hizkuntza batzuk umetan ikasten ez badira gero ia ezinezkoa da zuzen hitz egitea lortzea.
 
Topiko horiei aurre egiteko Lastategitik erabiltzaileak Juan Carlos Moreno Cabreraren hitzak erabili ditu: “Hizkuntzak berez ez dira ez zailak ez errazak. Berdin-berdinak dira”.