1908an, Ceferi Rocafort ikerlaria Lleidako (Katalunia) probintziaren inguruko datu geografikoak biltzen ari zela, bertakoek han inguruan kobazulo bat bazela eta barruan labar pinturak zeudela esan zioten. Kobazuloa bisitatu eta Roca dels Moros delakoaren aurkikuntza ofizial bilakatu zen berehala. Iaz, aurkikuntzaren 100. urteurrena zela eta, hainbat ekitaldi burutu zituzten, besteak beste Kataluniako Arkeologia Museoak eta Giza Paleoekologia eta Eboluzio Sozialeko Institutu Katalanak elkarlanean egindako bideoa. Bertan Ramon Viñas adituak margoen garrantzia eta horiek egiteko erabili zuten metodoa azaltzen du, hainbat animazio birtualez lagunduta. Orain, nahi duenak bideoa Interneten ikusteko aukera du http://es.youtube.com/iphesvideos helbidean.