Unescok hirugarrenez argitaratu du Arriskuan diren munduko hizkuntzen atlasa. Arrisku mailaren arabera, lau multzo egin ditu: 538 hizkuntza egoera kritikoan daude, 502 arrisku handian, 632 arriskuan eta 607 egoera ahulean. Azken multzo horretan sartu du Unescok euskara. Bestalde, Atlasaren aurreko edizioetan ez bezala, katalana eta galegoa ez dira arrisku egoeran dauden hizkuntzen artean azaltzen.
 
Nila Vigil-ek bere webgunean (nilavigil.wordpress.com) Atlasaren erredaktore buru Christopher Moseleyk esandako hitzak azaleratu ditu, ez baita ados haren iritziarekin. Moseleyren ustez, “inuzentea eta sinplista litzateke baieztatzea kolonialak izan diren hizkuntza handiak, hala nola, ingelesa, frantsesa eta espainiarra beste hizkuntzak desagertzearen errudun direla, beti eta leku guztietan”. Vigilen iritziz, “hizkuntza ez dago arriskuan berezko arrazoiengatik. Arriskuan dago bere ordez beste hizkuntza bat hasi delako tokia hartzen. Beraz, aspaldiko hizkuntzak betetzen zuen espazioa hartzera datorren hizkuntza hori hizkuntza hiltzaile bihurtzen da. Hizkuntza hiltzailea izatea ez da hizkuntzaren ezaugarria, hizkuntza bat besteekin moldatzeko moduak eragindakoa baizik. Ondorioz, ‘hizkuntza kolonial handien’ egitekoaz aritzean ez da analisi inuzente eta sinplista egiten, hain arin Moseleyk esan due moduan”.
 
Bestalde, peruarraren webgunean somatu dugu pozarren direla La teta asustada film peruarrak Berlinalen saria irabazi duelako, eta are gusturago daude filmeko protagonistak, Magaly Solierrek, saria jasotzerakoan ketxuaz hitz egin eta abestu zuelako.