Azken momentura arte ibiltzearen ondorioak. Legegintzaldiko legerik anbiziotsuena ez da garaiz iritsi eta ezin izan da Legebiltzarrean onartu. Javier Madrazok oposizioko taldeei egotzi die ezintasun hori, baina berak badaki Jaurlaritzako sozio duen EAJ-k erreparo handiak dituela Etxebizitzaren Legearekin eta hori erabakigarria izan dela proiektua atzeratzeko. Azkenean, hauteskundeetako pilota hutsa bilakatu da gazteentzako funtsezkoa den Legea.

Urrian aurkezturiko proiektuak 10 urtean 35.000 etxebizitza eraikitzea aurreikusten du alokairuan jartzeko. 2013rako herritarrek alokairu merke bat ziurtaturik izatea da helburua. Bide batez, etxebizitza hutsak merkaturatzeko neurriak hartu nahi ditu Lege-proiektuak, baina neurri horiek zehazteko zailtasun ugari izan ditu udal eta diputazioekin.

Alokairuzko parke publikoaren zain

Proiektu horren harira, Euskadiko Gazte Kontseiluak azaldu du beharrezkoa dela alokairuzko etxebizitzen parke publiko bat sortzea, “bokazio unibertsala” izango duena eta norbanakoaren eskubide bihurtuko duena etxebizitza edukitzea.