Nobela duzu Doris Lessingen Belarra kantari, birritan gainera: batetik, eleberria delako, eta bestetik, haren egileak 2007an Nobel Saria eskuratu zuelako. XXII. Jokin Zaitegi Sariketa irabazita euskaratu du Koro Navarrok idazle britainiarraren obrarik esanguratsuenetarikoa den hau. Heriotza batekin hasten da istorioa, eta momentu horretara iristeraino protagonistek izan dituzten gorabeherak azaltzen ditu. Nekazari pobreen alaba, Mary hirira alde egin zutenetakoa da. Han bizimodu erosoa izatea lortu du, baina nekazari errukarri batekin ezkondu eta pikutara joango da dena. Afrika hegoaldean girotua, Lessingen obra honek klase bereizkeria eta arrazakeria ditu ardatz.