www.blogak.com/garaigoikoa blogean Txerra Rodriguezek “Hegemonia edo (autozentroa)” izeneko artikulua idatzi du, gero eta gehiago aipatzen diren hegemonia esparruei buruz: "Euskaldunon komunitateak hegemonia esparruak eraiki behar ditu. Esaldi indartsua, bezain sinplea. Ba, nire ustez euskalgintzaren adar guztiak bat datoz esaldi honekin. Izan fishmanzale, izan odriozolazale, izan txepetxzale, izan Kontseilua, Topagunea, Berria, euskara elkarte, Kafe antzoki edo dena delakoa. Gainera, askok erabili dute era batera edo bestera esaldi hau azken aldi honetan –nik neuk ere autozentramendua aipatu nuen–: Jon Sarasua, Mikel Irizar, Mikel Zalbide, Kike Amonarriz, Joxe Manuel Odriozola [blogean horien hausnarketen zuzeneko lotura dago].

Euskaldunon komunitateak hegemonia esparruak eraiki behar ditu. Eta zer demontre da hori? Ba, euskaldunok euskara nagusi izango diren esparruak eraiki behar ditugula, gure komunitatea biziberritzeko, indartzeko edo salbatzeko. Bakoitzak erabili dezala berak nahi duena. Batzuek esparru fisikoak nahiago izango dituzte (UEMA kasu), beste batzuek berriz esparru sozialak –auzo-etxe-komunitate hurbila, nahiz hurbiltasun soziala–, edo bestelako esparruak –komunikabideak, kultura, lan mundua, ...–.

Ideia totem honen inguruan euskalgintza guztia biltzeko modurik bai? Behintzat Maltzagaraino, horrek esaten zuen moduan ....".