Bularreko minbiziagatik kimioterapia tratamendua jasotzen duten emakumeek kanabisetik eratorritako botika erabili ahal izango dute Katalunian, goragalearen kontrako botikek eraginkortasunik ez duten kasuetan. Birringailu eran merkaturatuko da Sativex izeneko botika hori; edukiontzi bakoitza kimioterapia saio bati dagokio, eta 35 euroren truke lortu ahal izango da.

Botika hori ez da oraindik medikamentu gisa onartu, baina mundu mailan aitzindaria izan den ikerketa batean bere eraginkortasuna frogatu ondoren –ikerketa Kataluniako Generalitat-eko Osasun Sailak bideratu du–, agintarien baimen bereziarekin erabili ahal izango da aurrerantzean, egoera terminalean edo oso larrian dauden gaixoekin eta modu konpasiboan. Horrela erabiltzen dira botika esperimentalak.

Sativex Kanadan baizik ez dago onartua oraingoz, esklerosi anizkoitza duten pazienteetan min neuropatikoa tratatzeko. Espainiako Estatuan eta Europako gainerako herrialdeetan ez dago erregistratua, eta ez da ageri indikazio terapeutiko nagusien artean ere.

Gorakoen kasuan, gaixoen %21,7k botaka egiteari utzi zioten kimioterapia zikloetan, kanabisaren eratorri hau hartu ondoren. Lau gaixotik hiruri antsietatea gutxitu zitzaien, eta guztiek hobera egin zuten oro har. Ikerketan 207 gaixok hartu dute parte. Horietatik, 32k esklerosi anizkoitzak eragindako min neuropatikoa zuten, 54k espastizitatea, 47k hainbat etiologiatako min neuropatikoa, 41ek minbiziak edota HIESak eragindako anorexia/kakexia sindromea, eta beste 33k –denak emakumeak– kimioterapia tratamenduaren ondoriozko goragaleak eta gorakoak.

Honakoa izan da administrazio publiko batek, kanabisaren erabilera terapeutikoaren aldeko eskari sozialari erantzunez, Espainiako Estatuan martxan jarritako aurreneko ikerketa. Gauzak ondo badoaz, beste autonomia erkidegoek ere eskatu ahal izango dute botika hori modu konpasiboan erabiltzea, behin Europako Medikamentuen Agentziak baimena eman ondoren.