Duela hiru urte kaleratu zuen Jon Gerediagak bere aurreneko poema liburua, Fitola balba, karpuki tui. Une txar batean sortua zen, depresio bat gainditu ondoren, eta nahiko iluna atera zitzaion. Guztiz bestelakoa da Jainkoa harrapatzeko tranpa izenekoa. Antza denez, azken urteotan hobe portatu da bizitza FTI-Antzerkiola Imaginarioaren sortzaile izandako egilearekin, eta bizitzari kantatzeko gogoa piztu zaio. Bizirik egotea da beretzat Jainkoa, Pamiela argitaletxearen bidez kaleratu den liburuaren hitzaurrean Anjel Zelaietak egin duen interpretazioan. Alde egiten duela dakien arren, bizitzaz ari da Jon Gerediaga; tartean borroka dagoelako, eta borroka horretan gizakia zoriontsua izan daitekeelako.