Espainiako gobernuak norberak bere kabuz bizi ahal izatea ahalbidetuko duen Errege Dekretua onartu du. Hori dela eta, 22tik 30 urtera bitarteko gazteek, urtean 22.000 euro gordin baino gutxiago irabazten badituzte eta beste hainbat baldintza betetzen badituzte, hilero 210 euroko laguntza eskuratzeko aukera izango dute. Gehienez ere, lau urteko diru-laguntza izango da. Aurreikusitakoaren arabera, asmo hori 2008ko urtarrilaren 1etik aurrera gauzatuko da, autonomia erkidegoekin kolaboraziorako hitzarmenak sinatzen direnean. Babes horien bitartez lehenengo urtean gutxi gorabehera 360.000 pertsonari laguntzeko asmoa dute, errenta kontratu bakoitzeko bi maizterri. Informazio hori Etxebizitzarako Ministerioak www.alquilerjoven.es webgunean dauka.
Etxebizitza alokatu nahi duten gazteentzako diru-laguntza formula berri hori mesedegarria izan daiteke, jakinda gazteek etxea erosteko eta bikoteko bizitza aurrera eramateko zailtasun anitz dituztela. Badakigu Hego Euskal Herriko etxebizitzen prezioak Espainiar Estatuko garestienetakoak direla; beraz, alokairuaren bidearen aldeko apustua egiten ari dira. Hala ere, plan horiek aurrera eramateko, alokatzeko etxebizitzak behar dira eta autonomia erkidego guztiek ezin dute baldintza hori bete. Euskal Autonomia Erkidegoan, esaterako, 2009ra arte aurreikusita zeuden alokatzeko pisuen %25a baino ez da eraiki iaztik.

CISen azken Barometroaren arabera, etxebizitzaren arazoa da Espainiar Estatuko biztanleen kezka nagusia; “langabeziak eta terrorismoak baino ardura handiagoa eragiten die”, eta orain arte herritarrentzat horiek ziren kezkarik larrienak. Era berean, beti ere aipatutako Barometroak dioenez, herritarren %67,2k uste du baliabide publiko gutxi erabiltzen dela etxebizitza politikarako. Iaz %65,5ak zuen iritzi hori. Dena dela, CISen aurtengo Barometroa Errege Dekretua ezagutarazi aurretik egindakoa da.

Laguntzak norentzat eta zenbatekoak

Alokairuko laguntzak jasotzeko eskubidea izango dute, oro har, 22 eta 30 urte arteko adina izan eta urtean 22.000 euro gordin baino gutxiago irabazten dutenek. Europar Batasunekoak ez diren atzerritarrek behin betiko bizileku baimena beharko dute. Alokatzeko antzeko beste ekimen batzuetan ez bezala, kasu honetan etxea alokatzeko prezioak ez du mugarik; Etxebizitza Ministerioaren arabera, irabazien muga nahikoa da laguntza eskuratzeko.

Lehen eta bigarren mailako senideek –aiton-amonak, aitaginarreba-amaginarrebak, osaba-izebak, gurasoak, neba-arrebak eta koinatuak– alokatzea debekatuta daukate. Horren helburua iruzurrik ez egitea da. Laguntza horiek eskuratu nahi dituztenek diru iturri erregularra eta gutxienez sei hilabeteko lana dutela erakutsi beharko dute. Soldatapekoak izan daitezke, autonomoak, ikerketa bekadunak eta ordaindutakoaren araberako prestazioak zein laguntza prestazioak hartzen dituztenak.

Gazteek euren kabuz bizi ahal izateko eskainitako diru kopurua hilero 210 eurokoa da, gehienez ere lau urtez. Alokatutako etxebizitza pertsona bat baino gehiagoren izenean badago, laguntzaren kopurua banatu egin behar da, baldintzak betetzen dituztenen artean. Horrela egoera jakin batzuk saihestea lortu nahi da: demagun hiru pertsonek 600 euroren truke etxe bera alokatzen dutela; gehienezko laguntza eskatuz gero, errenta doan aterako litzaieke eta 30 euroko irabazia lortuko lukete. Aipatutako laguntzaz gain, abalaren finantzaren kostuari aurre egiteko 120 euro eta fidantzarako 600 euroko interesik gabeko maileguak emango dira –kontratu berrietarako eta behin baino ez–.

Non eta nola eskatu

Diru-laguntza jasotzen duen maizterrak etxearen jabeari alokairua ordaintzen diola bermatzeko, Errege Dekretuak derrigortu egiten du, errenta eta laguntza, banketxe berean helbideratuta izatera. Hartara, banketxeak laguntza eman baino lehen ziurtatu egin beharko du maizterrak hileko ordainketa egin duela.

Laguntza kudeatzea autonomia erkidegoen eginkizuna da. Bertako Etxebizitza zerbitzuetan agiri hauek eman behar dituzte: interesdunaren NA, Gizarte Segurantzako zenbakia edo baliokidea, etxebizitzaren helbidea eta katastroaren erreferentzia, errentaren kontratua, titular kopurua eta maizterraren eta etxearen jabearen banketxeko datuak. Oraindik etxebizitzarik ez duenak ere eska lezake laguntza hau. Pisua aurkitzeko behin-behineko eskaria onartu dela iragartzen zaion unetik, hiru hilabete ditu errenta-kontratua aurkezteko. Etxea kokatuta dagoen autonomia erkidegoan dokumentazioa aurkeztu ondoren, erkidegoak bi hilabete baino lehen hartu behar du erabakia. Eskaria onartuz gero, interesdunari edo interesdunei eta Ministerioari jakinaraziko die. Erakunde honek eskaria aztertuko du eta baimena eman ordainketa finantza-erakunde kolaboratzailearen bidez egin dezan.