Zeresanik ez oso desberdinak dira udal hauteskundeak eta Espainiako Legebiltzarrekoak, baina emaitzek pistaren batzuk ere emango lituzkete. Besteak beste, ea ezker abertzaleak su-etenaren apurketari hautesontzietan nola eusten dion. 2001eko Eusko Legebiltzarrerakoetan EHk beherakada handia izan zuen, 143.000 boto eskuratuz.

Oraingoan ere, su-eten ondorengo lehen hauteskundeak lirateke, baina horretarako aurkeztea lortu behar du eta gaur egungo haizeak ez dira horren oso aldekoak. PPren eskariak argiak dira, eta PSOEren joera ETAren atentatuen gaitzespenari lotua dago.
Hau da, ANVk gaitzesten badu, aurkez daiteke, bestela ez. Zer aldatu da aurtengo maiatzeko hauteskundeetatik hona? Su-etenaren haustura. Baltasar Garzonek Batasuneko Mahai Nazionalaren espetxeratzean hartu duen ereduan moduan, PSOErentzat ere ANV maiatzeko hauteskundeetan aurkeztea onuragarria zen bake prozesurako eta orain ez. Euskal Herritik begiratuta bederen, juridikoa ala politikoa den eztabaidari ekitea denbora galtze hutsa da.

Edozein modutan, Espainiako Gobernu edo judikaturaren asmoek norabide jakin bat adierazten ari badira ere, ANVren asmoek zein
erantzun duten itxaron beharko da, emaitzak erabat aurreratu gabe.

Gabriel Gines bizkartzainaren aurkako atentatuak heriotzen atentatu moldera itzularazten gaitu eta horrek seguruenik borroka armatuaren ziklo luzea adierazten du berriz ere. Ez da zalantzarik, ETAk entzungor egiten dio euskal gizarteari, honek modu askotan adierazi baitu ez duela borroka armatuaren bidetik abiatu gura. Jose Luis Rodriguez Zapaterok edo Madrilgo edozelako gobernuk berdin egingo du gatazka politikoa errepresio soilez gainditzeko apustuan jarraituz gero, euskal gizarteak modu askotan erakutsi baitu gatazka negoziazioaz eta elkarrizketaz konpondu behar dela.

Hori bederen aldatu da, ETAk jarduera armatuari ekin dio eta alderdi abertzaleek behintzat elkarrizketaren bidearekin jarraitu behar dela diote publikoki, armak isilik egon ala ez. Errealitatean ere horrela izan baita beti, ezkutuko elkarrizketek behin eta berriz erakutsi duten moduan.