Markel Olano

«Kontziente gara EB-Aralarrek gobernura bidea erraztu digula»

  • 1965, Beasain. Filosofian lizenziatua. EAJko kidea da. Alderdi honetako EBBko kide izana. Gipuzkoako ahaldun nagusi berria da. Hona bere hautaketaz esandakoa: “Ahaldun nagusia izendatzeko unean jendeak serio nengoela adierazi zidan. Egia esan, estu nengoen, ardura sentitu nuen. Oro har, kanpaina hasi eta izendatua izan arte oso esperientzia interesgarria bizi izan dut, herritarren ondo-ondoan egoteak politikaren alde hurbilagoa sentiarazi dit. Ohi baino sentsazio biziagoak jaso ditut, eta halaber, egoera politiko zaila dela eta, une nahasiak ere sentitu ditut!”.
Mikel Asurmendi @masurmendi
2007ko uztailaren 22a
Markel Olano
Dani Blanco
Gipuzkoako ahaldun nagusi berriak ez du ardura berriaren zama ukatzen, ezta karguak karga sinboliko handia duenik ere. Ez du politika norbanakoen lidergoaren arabera ulertzen ordea, talde lanean baizik: “Kudeaketa politikoaren oinarria talde sendo egokia osatzea da eta horretan ari gara buru-belarri. Arduraren sentsazioa lantaldearekin partekatu nahi dut”, adierazi digu Markel Olanok.

Ardurak ardura, Irungo Foru Ogasunaren eskandulua tokatu zaizu. Oposizioko PSE-EEko Miguel Buen Lacambrak ez du sinesten afera argituko denik.


Batetik, jendea kezkatua izatea logikoa da. Foru Aldundiak irregulartasunak aztertu eta ikertu ondoren fiskaltzaren esku utzi zuen auzia. Hasi da epaiketa, prozesuak ohiko bidea izango du eta guk auziak argitu arterainoko bidea egitea nahi dugu. Bestetik, Miguel Buenek ez badu orain arte egindakoan federik, bada, hori justizian federik ez izatea da. Bere hitzak entzunda hori ondorioztatzen dut behintzat. Hala ere, Buenek justizian konfiantza osoa duela esan ohi du. Dirudienez, bera ahaldun nagusia izanda baino ez genuke fidatu behar justiziaz. Bere jarrera ez da demokratikoa. Beroaldi batean adierazitako hitzak direla pentsatu nahi dut, eta ez era kontzientean eginak.

Ardurak eta proiektuak tarteko, EBko Mikel Izagirrek “errauste planta geldiarazteko bidea ireki dela” esan du. Nola interpretatu dituzu hitz hauek?


Ez diot Mikel Izagirrek adierazitakoari erantzungo. Gobernu honen jarrera ezaguna da errauste plantaren inguruan sortu den polemikari buruz: EAk eta EAJk hondakin solidoak biltzeko dagoen plangintzari eusten diote, plangintza Aldundiak eta mankomunitateek onartu dute. Guk errauskailuaren beharra ikusten dugu, ez dugu alternatiba hoberik ikusten.

EBtik harago joanez, herri ekimen batzuek alternatibak badaudela diote.
Ez dakit dauden, egon daitezke. Baina Aldundiak eta mankomunitateek, prozesu luze baten ondoren, errauskailuaren eredua egokitzat jo dute. Eskuetan ditugun datuen arabera hori da lanabes egokiena. Egoera hauxe da: eskuduntza udalen esku izan da betidanik eta hauek mankomunitateei eskaini diete. Mankomunitateek erabaki behar dute nondik nora jo. Aldundiak bere iritzia dauka eta plangintza aurrera ateratzen ahaleginduko da, baita udalei zereginean lagunduko ere.


Alegia, aurreko gobernuak hasitako prozesuaren epeak betez gero planta Zubietan eraikiko da. Zuk, hala ere, “mankomunitateek planta geldiarazten badute, onartuko dugu” adierazi duzu.


Nik besterik ezin dut esan.

Ezin da ukatu bestelako jarrera bat dagoela ahaldun nagusi berriaren aldetik, zure aldetik, alegia.


Ez zait iruditzen. Kontuan hartu behar da hauteskundeak izan direla eta mankomunitateen osaketa berria dela. Baina oraindik ez da zehaztua zein den egoera berria, egoera berria dela ukatu gabe. EBk aldaketa egon daitekeela dio, baina, adibidez, nik ez dut garbi ikusten PSEren jarrera. Donostiako Udalean PSEk ordezkaritzaren parte inportantea EBri eman dio. Donostiak parte handia du San Markos Mankomunitatean eta PSEk eragin funtsezkoa izan dezake indar aldaketan. Egoera argitzeko dago. Erakundeetan hartuko diren erabakiak errespetatuko ditugula aurrera dezaket, baina nire aldetik ez da jarrera aldaketarik. Agian, sektore batzuek ur tanta bat izugarrizko enbata bihurrarazi nahi izan dute.

Zergatik kostatu zaizue horrenbeste gobernua osatzea, orain arte hirukoaren bertutea hainbeste aipatu duzuenean?


Esanak esan, EAJk eta EAk bakoitzak daukan programaren araberako negoziazioa landu behar izan dugu eta iritsi gara akordio batera. Lehenago egin zitekeela? Emaitza da garrantzizkoena, eta hor dago. Bigarren erronka Jaurlaritzako eskema Gipuzkoara ekartzea zen, EB-Aralar gobernuan izatea alegia. Programaren ikuspegitik desadostasun sakonak izan dira ordea, eta egongo dira. Ez da posible izan.

Zein neurrian kezkatzen zaitu Gipuzkoan hirukoaren bidez adostasuna ez lortzeak?


EB Bizkaiko Aldundiko gobernuan ere ez dago. Gipuzkoan polemika biziagoa izan da, egia da, baina egoera orokorra da.
Ez duzue hiruko gobernua osatzea lortu. Non dira desdostasunak eta nola ikusten duzu gobernua gutxiengoan?
Hainbat azpiegituren proiektuetan diferentziak izateaz gain, ogasuna edo zergen kudeaketan eta bilketan diferentziak ditugu. Desadostasuna, oro har, programan izan da, baditugu balio komun batzuk eta badauzkagu adostasunak, Jaurlaritzaren oinarri direnak, baina programaren ikuspegitik desadostasunak ditugu. Edonola ere, Batzar Nagusietan EB-Aralar abstenitu izana aurrerapausoa bada. Bai haiek eta bai gu kontziente gara horretaz, alegia EAJren hautagaiari bidea erraztu diotela ahaldun nagusia izateko.

Gobernua ez da egonkorra. Gai sozialetan talka egiten duzue EB-Aralarrekin. EBk du gobernuaren giltza antza.


Baina egonkortasuna ez da zalantzazkoa gai sozialetan talka egiten dugulako. Politikagintza ezin da talka estrategiaren ikuspegitik planteatu. Gure apustua hirukoa osatzea izan da. Gipuzkoan ere akordioa bilatu dugu. Alderdi bakoitzak bere gizarte eredua dauka eta hori aurkeztu dio gizarteari. Gehiengo osorik gabe ari gara eta horrek ezinbestean akordio berriak bilatzera behartzen gaitu. Areago, ahalegina alderdi guztien artean egin behar dugu. Niretzat, hala ere, landu beharreko aukera, egokiena, EB-Aralarrekin ikusten dut. Jaurlaritzan ere diferentzia programatikoak daude EAJ-EA eta EBren artean, baina programa komun bat eta akordioa lortu zuten. Hori da bidea. Hori da baita ere Gipuzkoan etorkizuneko apustua.

Udaletako indar politikoaren korrelazioa aldatzen ari da Gipuzkoan. Y grekoa, Pasaiako kanpoko portua eta errauste plantaren proiektuek ez al dute egoera gatazkatsua areagotuko Gipuzkoan?


Ez zait iruditzen, eta noski, ez dut horrelakorik gertatzea nahi. Nire ziurtasuna erakunde bakoitzak bere eskuduntza izatea da. Azpiegitura horiek aurrera ateratzeko unean, erabakitzeko unean, eskuduntzak non dauden zehaztea da kontua. Pasaiako kanpoko portua egiteko orduan Estatuak du eskuduntza nagusia, gainerako erakundeek parte hartu beharko genuke, baina eskuduntza Estatuarena da. Gipuzkoan egitekoa den Y grekoan Jaurlaritzak du ardura nagusia, udalek eta kasuon Aldundiak ere edukiko dugu gurea. Nik proiektuek oposizioa izatea zilegi ikusten dut, baina bakoitzak ezin du era boluntaristaz jardun, denari aurre egin diezaiokeen bezala jokatuz. Erakunde bakoitzak daukan eskuduntzaren arabera eragin dezake proiektuan, eta ezin dugu alarma sortu eta orain arte zehaztu diren plangintza guztiak hankaz gora jar daitekeenik pentsatu. Herritarrei proiektuen berri eman behar zaie. Errauste plantaren kasuan zehaztu dugu non dagoen ardura nagusia. Jakina, herritarrak kezkatuta daude zabor bilketaren arazoarekin eta irtenbideak eskaini behar zaizkie. Baina hartutako konpromisoak bere horretan mantenduko dira, aldaketarik dagoen edo ez, jarduerak berak argituko du, ez dugu orain arteko bidea baztertu behar denik esateko arrazoirik, ezta norabidea aldatzeko ere.

“ANVren zerrendak bidegabeki ilegalizatuak izan dira” esan duzu. Zure gobernuak zer egin dezake justizia egiteko?


Hori esan dut eta aitortu dut publikoki ANVko ordezkariekin batzartu garela. Aste honetan ere beste bilera bat izatea espero dugu, gure konpromisoa datozen lau urteetan elkarrizketa garatzeko egitura moduko bat finkatzea da. Horrek izango duen definizioa eurekin hitzartu behar dugu. Gure konpromisoa sakona da eta elkarrizketak izatea du helburu. Hortik aurrera eman beharreko urratsak aztertu behar ditugu. Batzar Nagusietan parte hartzeari dagokionean ez dira errazak izango, eta hori eurek ere onartu digute. Ikuspegi hori eurena da dena den, ez nirea, udaletan parte hartzeko formula bat izan daiteke, baina Batzar Nagusietan formula hori konplikatua da. ç


Orain arte EAJn ez zegoen beste jarrera bat dagoela zure eskutik, esango nuke nik.


Zure inpresioa hori bada...! Inpresioak inpresio, aizu! Nire inpresioa da EAJ bat dela. EAJn ikuspegi diferenteak eta eztabaidak izan daitezke, baina ez dut onartzen bi EAJ daudela esatea, ez alderdian zatiketa dagoenik. Jarrera pertsonalak izan daitezke, giza talde eta alderdi guztietan daude, baina kasuon EAJren eta EAren babesa duen gobernu honen izenean garbi utzi nahi dut nondik natorren eta zer ordezkatzen dudan. Halaber, gipuzkoar guztiak ordezkatzen ahaleginduko naiz.

Ez al zaitu kezkatzen zure jarrerarekin kritikoak direnek –PSEko eta PPko oposizioak– gobernuan higadura modukoa eragiteak bake eta normalizazio prozesuaren egoera tarteko?


Higadura guretzat zer den argitu nahi nuke. Gure ustez hiritarren aurrean ahuldadea litzateke erreferentzialtasun politikoa galdu dugun inpresioa hedatzea eta onartzea, alegia, herritarrek eskaini diguten konfiantza hori bere horretan galdu egin dela onartzea, hiritarren aurrean porrot egin dugula litzateke higaduraren definizioa. Hiritarrek garbi dute Euskal Herrian oso arazo sakonak daudela, hamarkadak daramatzagu arazoak konpondu nahian, herritarrek emaitzak ere testuinguru honetan baloratzen dituzte, jendeak ez du exijitzen lau urtetan arazo guztiak konpontzea, elkarrizketa lantzeko jarrera egokia eskatzen digu. Gaurko gizarteak jendearekin egotea, hitz egitea, jendeari entzutea eskertzen du bereziki, eta zeregin horretan lidergo bat finkatzea eta urratsak ematea. Gizarteak hori guztia zugan hautematen badu higadurarik ez dago.

Inpresioak inpresio, hona azkena: hauteskunde kanpaina hasi zenean EAJko Egibarren sektorea galtzen hasi zen. Markel Olano ahaldun nagusia hautaturik Egibarren sektorea garaile atera da.


Niri ez zait EAJn sektoreei buruz hitz egitea gustatzen. Ikuspegi ezberdinak izan daitezke, alderdiaren barruan behar bezalako elkarrizketak eta eztabaidak daude, alderdi guztietan bezala. Eta egongo da eta hori oso aberasgarria da. Sektoreak eta pertsonak aipatzea ez ditut gustuko hala ere. Guk izan ditugun erasoak EAJren aurka izan dira, EAJ osoak hartu ditu, eta izan ditzakegun arrakasta edo porrotak EAJrenak dira eta izango dira. Nik EAJko partaidetzat jotzen dut nire burua. Kasu honetan, gainera, bi alderdien ordezkaria naiz eta Gipuzkoa osoko ordezkari nagusia. Beraz, urrun nago balorazio horietatik.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
Bardean benetako bonbekin maniobra militarrak eginen dituzte asteazken honetatik aurrera

Urriaren 17tik 19ra eginen ditu Espainiako Armadak maniobrak, beste behin. Tiro Poligonoaren Aurkako Taldeak salatu du "Parke Naturalean gailentzen dela maniobra horiek egiteagatik Armadak ordaintzen duen kanona segurtasuna eta ingurumenaren gainetik".


2018-10-17 | ARGIA
Pinuen gaitzari aurre egiteko oxido kuprosoa erabiltzea oso toxikoa dela salatu dute

Pinuen gaitzari aurre egiteko Jaurlaritzak eta EAEko hiru foru aldundiek aurkeztu duten plana gogor kritikatu du Naturkon kolektiboak, besteak beste gaitzari aurre egiteko erakundeek proposatu duten oxido kuprosoa toxikoa baita: “Azalduko al digute gure ordezkariek nola pentsatu duten ziurtatzea gure ibaiak edo edaten dugun ura ez direla pozoituko gure mendietako 124.000 hektarea fumigatzen badira?”.


2018-10-17 | Iigo Igartua
Manifestazio nazionala deitu dute urriaren 27an Nafarroako gaztetxeen alde indarrak biltzeko

Maravillas, Errotxapea eta Lizarrako gaztetxeen aurkako prozesu judizialak irekita daude eta epe motzean kaleratuak izateko arriskuan daudela ohartarazi dute manifestazioa deitu dutenek.


2018-10-17 | ARGIA
Karlos Apeztegia kartzelaratzeko agindu du Espainiako Auzitegi Nazionalak

Etxerat euskal presoen senide eta lagunen elkarteak Hernanin duen bulegoan egiten du lan Karlos Apeztegiak. Asteartean bertatik atera zenean atxilotu zuen Guardia Zibilak eta asteazken goizean, espetxeratzeko agindua eman du Espainiako Auzitegi Nazionaleko epaileak, "erakunde terroristako kide" izatea leporatuta.


2018-10-17 | ARGIA
Irueko sutea indarkeria matxista kasu bat izan daiteke

Hipotesi hori darabil gertakaria ikertzen diharduen Espainiako Poliziak. Hala bada, ikerketa bere gain hartu zuen instrukzio epaileak Emakumeen aurkako indarkeriaren arloko epaitegira bideratuko du kasua.


2018-10-17 | ARGIA
Eider Rodriguez, Irene Aldasoro eta Kepa Altonaga Euskadi Sarien irabazle

Asteazken honetan jakinarazi dituzte literaturako Euskadi Sarietan falta ziren kategorietako irabazleak: Eider Rodriguezek aurtengo bigarren saria eskuratu du, oraingoan haur eta gazte literaturari eskainitako kategorian, Santa familia liburuari esker.


2018-10-17 | Iigo Igartua
Kalean bizi den jendearen zenbaketa: errefuxiatuen auziari erantzun ezean, ez espero miraririk

Ostegun honetan zenbatuko dira Araba, Bizkaia eta Gipuzkoan zenbat pertsona bizi diren kalean. Erakunde publikoak konprometitu ziren etxegabeen kopurua %20 jaistera, baina errefuxiatuen krisiari emandako erantzun eskasa ikusita, zaila dirudi aurreikuspena betetzea. Bilboko kasuari erreparatu diogu.


2018-10-17 | ARGIA
Parisko Cervantes Institutuaren eraikina EAJri bueltatzeko eskatu dio Ortuzarrek Espainiari

Andoni Ortuzar EAJko presidenteak asteartean Espainiako Estatuari eskatu dio itzul dezala Cervantes Institutuak gaur egun Parisko Marceu etorbidean daukan eraikin bat, 1936an EAJk erosi zuena eta II. Mundu Gerran Gestapok –Alemania naziaren polizia sekretua– bereganatu zuena.


EAEn 'fracking'-a abiarazteko urrats berriak egin ditu Jaurlaritzak: zundaketak baimendu Bizkaia eta Gipuzkoan

Eusko Jaurlaritzak baimena eman du Bizkaia eta Gipuzkoako 1.300 kilometro koadrotan zehar lurpean egon daitezkeen erregaien bilaketan ikerlan eta zundaketak egiteko. Zundaketa lanetan "fracking" teknika erabiliko ez dela aipatu den arren, zundaketa berriok dira urrats garrantzitsu bat Ibarretxeren garaietatik teknika horrekin hidrokarburoak ustiatzeko Jaurlaritzak egindako apustua aurrera eramateko.


2018-10-17 | dantzan.eus
Indarkeria ardatz hartuta, Bilboko antzerki eta dantza garaikide jaialdia hasiko da asteazken honetan

Bilboko Udalak antolatzen duen BAD jaialdia urriaren 17tik 28ra hiriko sei agertokitan ospatuko da dantza eta indarkeria lotuz. Bilboko Antzerki eta Dantza Garaikide Jaialdiak, lau estreinaldi eskainiko ditu Campos Antzokian, Sandra Gómez, Blanca Arrieta, Isaak Erdoiza eta Pablo Fidalgo artisten eskutik. Horrez gain, BADek lekua gorde du nazioartean ibilbidea duten ekoizpen lanetarako, Arkadi Zaides koreografoaren Archive edo Juan Domínguezen My Only Memory lanetarako, adibidez.


ASTEKARIA
Azkenak
EGILEA
Eguneraketa berriak daude